Joylarda propan ta’minotidagi uzoq kechikishlar davom etmoqda
Farg‘ona viloyati Bag‘dod tumani Qirqvoldi qishlog‘i ahli 18-avgust kuni hamma ishini yig‘ishtirib, ertalabdan kechgacha gazballon kelishini kutdi. Ularga oxirgi marta suyultirilgan gaz berilganiga uch oydan oshib ketgan. “Deyarli 12 soatdan beri kutyapmiz. Ta’rifga til ojiz-da endi. Ilon Mask Marsga bir balolar quramiz deyapti, biz esa gazballon kutib o‘tiraveramiz. Yaxshi bo‘lib ketadi, xudo xohlasa”, deydi Kun.uz'ga yuborilgan video muallifi.
Farg‘ona viloyatida suyultirilgan gaz yetkazib berishdagi uzoq muddatli uzilishlar davom etmoqda.
Tarqalgan videoda o‘nlab qishloq aholisi propan ballonlarini uzun navbatga terib qo‘ygan holda, ularni olib keladigan yuk mashinasini kutayotgani aks etgan. Ularga bir kun avval "ertaga gazballon keladi" deb aytilgan.
"2026-yil 18-avgust. Shom tushib, oy chiqdi. Ertalab soat 9 dan beri ishimizni tashlab o‘tiribmiz. Oxirgi marta suyultirilgan gaz 12-mayda kelgan edi. Mana, uch oydan oshdi, gazballon yo‘q. Deyarli 12 soatdan beri kutamiz. Bu holatni ta’riflashga til ojiz. Ilon Mask Marsda bir nimalar qurishni rejalashtirayotgan bir paytda, biz gazballon kutib o‘tiraveramiz. Xudo xohlasa, hammasi yaxshi bo‘lib ketadi", – deydi murojaatchi.
Aholi tuman gaz idorasiga borib, idora boshlig‘iga shikoyat qilgan. Boshliq jazirama issiq tufayli xavfsizlik nuqtai nazaridan soat 11:00 dan 17:00 gacha gazballonlarni to‘ldirishga cheklov qo‘yilganini aytib, kechikishni shu bilan izohlagan.
Qishloq aholisi bunga javoban: "Haydovchiga telefon qilib, bugun keladimi yoki ertaga, shuni bizga aniq bilib bering", – degan.
Gaz idorasi rahbari esa haydovchining bugun kelishi yoki kelmasligini o‘zi ham bilmasligini, bu Oltiariqdagi quyish shoxobchasiga va u yerdagi navbatlarga bog‘liqligini bildirgan.
Kun.uz uch hafta avval, iyul oyi oxirida Farg‘ona viloyati Quva tumanida ham 100 kundan oshiq vaqtdan beri suyultirilgan gazballon yetkazib berilmagani haqida reportaj e’lon qilgan edi. Ko‘p o‘tmay, aholi xonadonlariga propan ta’minotidagi uzoq kechikishlar butun respublikaga yoyilgani ma’lum bo‘ldi.
O‘shanda Energetika vazirligi bu yo‘nalishdagi mavjud muammolarni bosqichma-bosqich bartaraf etish ishlari olib borilayotganini ma’lum qilgan edi.
Ma’lumot uchun, Farg‘ona viloyatidagi 509 mingta xonadonning ehtiyojini qoplash uchun (har biriga 20 kg dan) oyiga o‘rtacha 10,2 ming tonna suyultirilgan gaz kerak bo‘ladi, ammo yil boshidan beri biror marta oyiga buncha propan yetkazib berilmagan. Yanvar oyida 8,5 ming tonna bo‘lgan ko‘rsatkich oydan oyga pasayib, may oyida 4 ming tonnaga, iyunda esa 4,9 ming tonnaga tushib qolgan. Bu esa ehtiyojning yarmini ham qoplamaydi.