Oʻzbekistonda ommaviy tadbirlarda qoidabuzarlarning elektron hisobini joriy etish taklif qilindi
Bespilotniklardan olomonni nazorat qilish va tiqilinchning oldini olish uchun foydalaniladi. Bundan tashqari, tadbirlar oʻtkaziladigan joylardan 500 metr radiusda alkogol sotishni cheklash rejalashtirilmoqda.
Oʻzbekistonda ommaviy tadbirlarda qoidabuzarlarning elektron hisobini joriy etish taklif qilindi
Oʻzbekistonda ommaviy tadbirlarni oʻtkazish qoidalarini buzgan shaxslarning elektron hisobini tashkil etish taklif qilinmoqda. Bu haqda Ichki ishlar vazirligi tomonidan tayyorlangan hukumat qarori loyihasida aytiladi.
Hujjatda taʼkidlanishicha, qonunchilikka koʻra, bunday tadbirlarga kirish qoidabuzarlar uchun jinoyat ishlari boʻyicha sud tomonidan vaqtincha cheklanishi mumkin. Loyihada 2027 yildan boshlab ularning elektron hisobini yuritish nazarda tutilgan.
Bundan tashqari, hujjatda ommaviy tadbirlar oʻtkaziladigan joylardan 500 metr radiusda alkogol sotishni cheklash taklif etilmoqda.
Shuningdek, xavfsizlikni taʼminlash uchun dronlardan foydalanish rejalashtirilmoqda. Ular yordamida olomonni nazorat qilish, shuningdek, odamlarning ommaviy toʻplanishi va tiqilinch bilan bogʻliq xavflarni oʻz vaqtida aniqlash koʻzda tutilgan.
Loyihada amaldagi taqiq ham saqlanib qolmoqda: reklama maqsadida olomonni jalb qilish uchun tovarlarni bepul tarqatish yoki juda arzon narxlarda sotishni tashkil etish ilgarigidek mumkin emas.
IIV, shuningdek, kontsertlar va sport musobaqalariga chiptalarni faqat elektron shaklda sotishni hamda tadbirni oʻtkazishga rasmiy ruxsatnoma olingunga qadar ularni sotishni taqiqlashni taklif qilmoqda.
Qaror loyihasining jamoatchilik muhokamasi 20 noyabrgacha davom etadi.