Oʻzbekistonda oʻzini oʻzi band qilgan taksichilar soni 5 mingtaga koʻpaydi
Soliq qoʻmitasi oʻzini oʻzi band qilgan taksichilar soni keskin kamaygani haqidagi xabarlarni rad etdi hamda sohadagi qatnovlar va daromadlar toʻgʻrisidagi maʼlumotlarni taqdim etdi.
Oʻzbekistonda oʻzini oʻzi band qilgan taksichilar soni 5 mingtaga koʻpaydi
Oʻzbekistonda yoʻlovchi tashish bilan shugʻullanuvchi oʻzini oʻzi band qilgan fuqarolar soni bir yil ichida 5 ming kishiga koʻpayib, 2026 yil 1 sentyabr holatiga koʻra 782,5 ming kishiga yetdi. Soliq qoʻmitasi ijtimoiy tarmoqlarda oʻzini oʻzi band qilgan taksi haydovchilari soni sezilarli darajada kamaygani haqida tarqalayotgan xabarlar metodologik noaniqliklar bilan bogʻliqligini maʼlum qildi.
Idora maʼlumotlariga koʻra, 2025 yil 1 sentyabr holatiga koʻra, yoʻlovchi tashish sohasida roʻyxatdan oʻtgan oʻzini oʻzi band qilganlarning umumiy soni 777,1 ming kishini tashkil etgan. Shu bilan birga, 2025 yil 1 yanvardan 1 sentyabrgacha taksi agregatorlari orqali 481 149 nafar oʻzini oʻzi band qilgan shaxs faoliyat koʻrsatgan.
2026 yilning shu davrida agregatorlar orqali 481 117 nafar oʻzini oʻzi band qilgan shaxs faoliyat yuritgan. Shu tariqa, ularning soni 32 kishiga kamaygan.
Shu bilan birga, yoʻlovchi tashish sohasida oʻzini oʻzi band qilganlarning umumiy soni 777,1 ming kishidan 782,5 ming kishiga, yaʼni taxminan 5 ming kishiga koʻpaygan.
Soliq qoʻmitasi ayol haydovchilar soni ortganini alohida maʼlum qildi. 2026 yilning sakkiz oyida ularning soni oʻtgan yilning shu davridagi 3 753 nafarga nisbatan 4 107 nafarni tashkil etdi. Oʻsish 354 kishini yoki 10 foizni tashkil etdi.
2026 yilning sakkiz oyida mamlakatda umumiy qiymati 7 168,4 mlrd soʻmlik 329,1 mln ta qatnov amalga oshirildi. 2025 yilning shu davriga nisbatan qatnovlar soni 9 foizga, ularning umumiy qiymati esa 23 foizga oshdi.
Soliq qoʻmitasi taksi agregatorlari orqali ishlaydigan oʻzini oʻzi band qilganlar dinamikasi bozordagi tabiiy jarayon ekanligini taʼkidladi. Idora oʻtgan davr natijalari va sohaga boʻlgan qiziqish saqlanib qolayotganini hisobga olgan holda, 2026 yil oxirigacha koʻrsatkichlar oʻsishi saqlanib qolishini kutmoqda.
Qoʻmita baholashiga koʻra, yoʻlovchi tashish sohasida rasmiy bandlikning kengayishi qonuniy daromad manbalarining koʻpayishiga va xizmatlar bozori shaffofligining oshishiga xizmat qiladi.