Oʻzbekistonda maktab direktorlarini vazirlik bilan kelishilmagan holda yigʻilishlarga chaqirish taqiqlanadi

Oʻzbekistonda maktab direktorlarini vazirlik bilan kelishmasdan yigʻilishlarga chaqirish taqiqlanadi

Oʻzbekiston Bosh vazirining birinchi oʻrinbosari — taʼlim va fan vaziri Erkinjon Turdimov maktab direktorlarini vazirlik bilan kelishmasdan yigʻilishlarga chaqirish taqiqlanganini maʼlum qildi.

«Maktab direktorlarini yigʻilishlarga, jumladan hokimliklarga chaqirish qatʼiyan man etiladi. Har qanday yigʻilishda ishtirok etish faqat vazirlik bilan kelishilgan holda mumkin. Shundan keyingina direktor yigʻilishga borishi mumkin», — dedi Turdimov.

Vazirning soʻzlariga koʻra, taʼlim muassasalari rahbarlari koʻplab majlislarga vaqt sarflamasdan, oʻzlarining bevosita vazifalari bilan shugʻullanishlari kerak.

«Maktab taʼlim bilan, bogʻcha bolalar tarbiyasi bilan shugʻullanishi kerak. Ular yigʻilishlarga bormasligi lozim. Agar kimnidir yigʻilishga taklif qilish kerak boʻlsa, xoʻjalik ishlari boʻyicha mudir (zavxoz) bor-ku. Umuman, maktab direktorini hokimlikka chaqirishdan nima naf?» — dedi u.

Misol tariqasida Turdimov hokimlikdagi faoliyatidan bir holatni keltirib oʻtdi. Uning soʻzlariga koʻra, u taʼlim muassasalari rahbarlaridan biriga yigʻilishlarga qatnashishni bir necha bor taqiqlagan, ammo u boshqa mansabdor shaxslarning topshiriqlarini vaj qilib, baribir kelishda davom etgan.

«Men unga: „Yigʻilishga borsang, oyogʻingni sindiraman“… degandim. U esa baribir kelaverardi. „Nimaga kelding?“ deb soʻrasam, „Kelishni aytishdi“… deydi. Men unga: „Mening gapim sen uchun dorimi? Unda telefoningni chiqar, diktofonni yoq va yozib ol. Men senga hammasini batafsil tushuntirib beraman“, deganman», — deb soʻzlab berdi vazir.

U ushbu taqiq maktab rahbarlarini majlislarga kim taklif qilishidan qatʼi nazar, bajarilishi shartligini taʼkidladi.

Yigʻilishda Erkinjon Turdimov, shuningdek, taʼlim sohasida, xususan, oliy va maktabgacha taʼlim sohasida ikkita yirik loyihani amalga oshirish rejalari haqida gapirib oʻtdi.

Uchrashuv davomida vazir xususiy taʼlim sohasida faoliyat yuritayotgan tadbirkorlarning takliflarini tingladi hamda nodavlat maktablar va bogʻchalarni litsenziyalash tartibini qayta koʻrib chiqish tarafdori ekanini bildirdi.

Uning fikricha, agar obʼyekt vakolatli organlar tomonidan tekshirilib, zarur ruxsatnomalarni olgan boʻlsa, Taʼlim va fan vazirligidan alohida litsenziya olish zarurati savollar tugʻdiradi.

«Agar sanitariya-epidemiologiya xizmati, qurilish, yongʻin xavfsizligi va boshqa tegishli organlar hammasini tekshirib, ruxsatnoma bergan boʻlsa, vazirlik qaysi asosga koʻra litsenziya beradi? U aynan nimani tekshiradi? Umuman olganda, xususiy bogʻcha va maktablarni ochishda vazirlik tomonidan litsenziyalashni bekor qilish kerak», — dedi Turdimov.

Turdimov, shuningdek, xususiy taʼlim muassasalarining muammolari hal etilishini taʼminlamagan mansabdor shaxslarni tanqid qildi. U oʻz vazifalarini bajarmayotgan vazirlik xodimlari lavozimidan ozod etilishi mumkinligidan ogohlantirdi.

Yigʻilishda Samarqand viloyati qurilish boshqarmasining faoliyati alohida tanqidga uchradi. Keyinchalik idora rahbari hududda qurilish hujjatlari bilan bogʻliq 522 ta muammoli masala mavjudligini, ulardan beshtasi xususiy taʼlim muassasalariga tegishli ekanini aniqlashtirdi.

Bundan tashqari, vazir taʼlim tashkilotlarining murojaatlarini qabul qilish uchun alohida elektron platformani ishga tushirish rejalari haqida maʼlum qildi.

Uning soʻzlariga koʻra, zarur sharoitlar yaratib boʻlingan, asosiy vazifa esa intizomni yoʻlga qoʻyish va talabchanlikni oshirishdan iborat.