Oʻzbekistonda jamiyat va iqtisodiyot uchun alohida ahamiyatga ega boʻlgan kompaniyalar roʻyxati yangilandi

4 soat oldin

Oʻzbekistonda jamoat ahamiyatiga ega tashkilotlar reyestriga 449 ta korxona kiritildi. Ushbu roʻyxatga kirish uchun yirik kompaniyalar aktivlar, tushum va xodimlar soni boʻyicha talablarga javob berishi kerak. Shu bilan birga, Yandex, Wildberries, UzIMEI va Turon roʻyxatga kiritilmadi.

Mamlakatda jamoat manfaatlariga daxldor tashkilotlarning (Public Interest Entities, PIE) maxsus maqomi amal qilmoqda. Ushbu kategoriyaga iqtisodiyot va jamiyatga sezilarli taʼsir koʻrsatadigan hamda keng manfaatdor tomonlar doirasi uchun muhim boʻlgan kompaniyalar kiritiladi.

Ushbu maqom prezident qarori bilan joriy etilgan. Reyestr Iqtisodiyot va moliya vazirligi tomonidan Soliq qoʻmitasi va boshqa davlat organlarining maʼlumotlari asosida shakllantiriladi.

Roʻyxatga aktsiyalari birja listingiga kiritilgan kompaniyalar, tijorat banklari, mikromoliya va toʻlov tashkilotlari, investitsiya fondlari, birjalar hamda davlat ishtirokidagi yirik korxonalar kiradi.

Boshqa kompaniyalar, agar oxirgi ikki kalendar yili davomida ularning aktivlari va sof tushumi har biri kamida 440 milliard soʻmni tashkil etgan boʻlsa, xodimlarning oʻrtacha yillik soni esa 500 kishidan kam boʻlmasa, roʻyxatga kiritilishi mumkin.

2024 va 2025 yillar yakunlari boʻyicha reyestrni shakllantirishda soliq organlariga taqdim etilgan moliyaviy hisobot maʼlumotlari hisobga olindi. Iqtisodiyot va moliya vazirligi maʼlumotlariga koʻra, belgilangan mezonlarga 449 ta korxona mos keladi.

Yandex, Wildberries, UzIMEI va Turon biznes hajmi mezoni boʻyicha reyestrga kiritilmadi, chunki oxirgi ikki yilda ushbu kompaniyalarda xodimlarning oʻrtacha soni 500 kishiga yetmagan.

Jamoat ahamiyatiga ega tashkilotlar reyestri muntazam ravishda yangilab boriladi.

Oʻzbekistonning jamoat ahamiyatiga ega tashkilotlari reyestri ilk bor shu yilning iyun oyida eʼlon qilingan edi. Oʻshanda unga 425 ta tashkilot kiritilgan edi.