Oʻzbekistonda ichimliklarni tarkibidagi shakar miqdoriga qarab markirovkalash joriy etilmoqchi

Oʻzbekistonda ichimliklarni shakar miqdori boʻyicha markirovkalashni joriy etish taklif qilinmoqda

Oʻzbekistonda 2027 yil 1 yanvardan boshlab tarkibida shakar miqdori yuqori boʻlgan alkogolsiz ichimliklar uchun ogohlantiruvchi markirovka joriy etilishi kutilmoqda. Bunday loyiha Sogʻliqni saqlash vazirligi tomonidan tayyorlandi.

Markirovka hajmi ichimlikning 100 ml hajmidagi shakar miqdori bilan belgilanadi. Agar uning miqdori 5 dan 8 grammgacha boʻlsa, qadoqda «Oʻrtacha shakar miqdori», 8 dan 11 grammgacha boʻlganda esa — «Yuqori shakar miqdori» degan yozuv paydo boʻladi.

Tarkibida 11 gramm va undan ortiq shakar boʻlgan ichimliklar uchun: «Juda yuqori shakar miqdori — tez-tez isteʼmol qilish sogʻliq uchun zararli» degan yozuvdan foydalanish taklif etilmoqda.

Ogohlantirish qadoqning old tomoniga joylashtiriladi. U maydonning kamida 15 foizini egallashi va yaqqol koʻzga tashlanib turishi kerak. Bundan tashqari, tarkibi, kaloriyasi va kunlik isteʼmol meʼyori toʻgʻrisidagi maʼlumotlarni oʻz ichiga olgan QR-kod joylashtirish rejalashtirilmoqda.

2027 yil 1 martgacha ichimliklarni laboratoriya tahlilidan oʻtkazishning yagona metodikasini tasdiqlash taklif etilmoqda. 1 sentyabrgacha esa akkreditatsiyadan oʻtgan laboratoriyalarda shakar miqdorini aniqlashni tashkil etish rejalashtirilgan.

Shuningdek, Sogʻliqni saqlash vazirligi tarkibida shakar miqdori yuqori boʻlgan ichimliklar reyestrini yaratish va har chorakda eʼlon qilib borishni taklif etmoqda.