Oʻzbekistonda haydovchilarni chorrahalar oldidagi yaxlit chiziqni bosganlik uchun jarimaga tortish toʻxtatiladi

Oʻzbekistonda haydovchilar chorrahalar oldidagi yaxlit chiziqni bosib oʻtgani uchun boshqa jarimaga tortilmaydi

1 noyabrdan Oʻzbekistonda haydovchilarni yaxlit chiziqni bosib oʻtgani uchun javobgarlikka tortish tartibi oʻzgaradi. Yoʻl-patrul xizmati inspektorlari chorrahagacha boʻlgan 50 metr va qayrilib olish joylarigacha boʻlgan 20 metr masofada bunday qoidabuzarliklar uchun maʼmuriy bayonnomalar tuzmaydi.

Tegishli oʻzgarishlar Vazirlar Mahkamasining 29 oktyabrdagi qarori bilan mustahkamlandi.

Gap 1.1 va 1.3 gorizontal yoʻl chiziqlarini bosib oʻtish haqida bormoqda. Hujjatdan kelib chiqishicha, ushbu hududlarda YPX xodimlari uni bosib oʻtganlik uchun maʼmuriy bayonnomalar tuzmaydi.

Eslatib oʻtamiz, 1 noyabrdan Oʻzbekistondagi xususiy avtomatilashtirilgan kameralar haydovchi va yoʻlovchilar xavfsizlik kamarini taqmagani holatlarini qayd etishi mumkin boʻladi. Buning uchun uskunalar belgilangan texnik talablarga javob berishi va qoidabuzarlik haqidagi maʼlumotlarni "Maʼmuriy amaliyot" moduliga avtomatik ravishda uzatish imkoniyatiga ega boʻlishi kerak.

Xususan, tizim metrologik qiyoslash toʻgʻrisidagi guvohnomaning raqami va amal qilish muddatini, qoidabuzarlik sodir etilgan sana va vaqtni, shuningdek, u sodir etilgan joyning aniq koordinatlarini qayd etishi kerak. Bundan tashqari, fotosuratlarda haydovchining yuzi va xavfsizlik kamari taqilgani yoki yoʻqligi aniq koʻrinib turishi kerak.

Hozirgi vaqtda Oʻzbekistondagi xususiy kameralar tezlikni oshirish, svetoforning taqiqlovchi signaliga oʻtish, stop-chiziqni va qarama-qarshi harakatlanish boʻlagini bosib oʻtish, yoʻl belgilari talablariga rioya qilmaslik, shuningdek, harakatlanish, toʻxtash va toʻxtab turish qoidalarini buzish holatlarini qayd etmoqda.