Oʻzbekistonda gaz ballonli avtomobillar uchun yangi qoidalar tushuntirildi
1 sentyabrdan boshlab gaz ballonli avtomobillar zapravkalardan ommaviy ravishda qaytarib yuborilmaydi: yangi qoidalar sinovdan oʻtkazish muddati tugagan taqdirda amal qiladi.
Oʻzbekistonda gaz ballonli avtomobillar uchun yangi qoidalarga tushuntirish berildi
1 sentyabrdan boshlab Oʻzbekistonda gaz ballonli avtomobillar yoqilgʻi quyish shoxobchalaridan ommaviy ravishda qaytarib yuborilmaydi, haydovchilar esa bir vaqtning oʻzida QR-kodlarni rasmiylashtirishlari shart boʻlmaydi.
Sanoat, radiatsiya va yadro xavfsizligi qoʻmitasi xabar berishicha, yangi tartib faqat gaz ballonini navbatdagi texnik sinovdan oʻtkazish muddati kelgandagina amal qiladi.
Ushbu tushuntirish 1 sentyabrdan goʻyoki barcha gaz ballonli avtomobillar egalari tekshiruvdan oʻtishlari va QR-kod olishlari kerakligi haqidagi xabarlar fonida eʼlon qilindi.
Qoʻmitada taʼkidlanishicha, amaldagi texnik sinov muddati hali tugamagan haydovchilar mavjud hujjatlar asosida avtomobillardan keyinchalik ham foydalanishlari mumkin. 1 sentyabrdan ulardan qayta tekshiruvdan oʻtish yoki zudlik bilan yangi QR-kod rasmiylashtirish talab etilmaydi.
Tekshiruv belgilangan texnik sinov muddati kelganidan keyin rejali tartibda oʻtkaziladi.
Natijalar elektron tizimga kiritilgandan soʻng, QR-kodli tegishli hujjat rasmiylashtiriladi. Shu tariqa, yangi tartib barcha haydovchilarning bir vaqtning oʻzida laboratoriyalarga murojaat qilishini nazarda tutmaydi.
Tizim Vazirlar Mahkamasining 2026 yil 18 iyundagi 315-sonli qaroriga muvofiq joriy etilgan. Uning asosiy vazifalari qatoriga gaz ballonlarining texnik holatini nazorat qilish, qalbaki hujjatlardan foydalanishning oldini olish hamda gaz uskunalari bilan bogʻliq avariyalar va boshqa koʻngilsiz hodisalar xavfini kamaytirish kiradi.
Misol uchun, agar ballon 2025 yilning martida texnik sinovdan oʻtgan boʻlsa va berilgan hujjat 2028 yilning martigacha amal qilsa, unda 1 sentyabrdan keyin qayta tekshiruvdan oʻtish shart emas. Haydovchi, shuningdek, darhol QR-kod olishga majbur emas va amaldagi hujjat asosida avtomobildan foydalanishni davom ettirishi mumkin.
Agar sinov muddati 2026 yil 1 sentyabrdan keyin tugaydigan boʻlsa, unda belgilangan muddat kelganda rejali tekshiruvdan oʻtish, uning natijalarini elektron tizimga kiritish va QR-kodli hujjatni rasmiylashtirish zarur.
Avtomobilga yangi gaz balloni oʻrnatilganda ham uni tekshirish va hujjatlarni rasmiylashtirish belgilangan tartibda amalga oshiriladi.
Qoʻmitada yangi tartib, eng avvalo, fuqarolar xavfsizligini taʼminlash hamda ularning hayoti va sogʻligʻini muhofaza qilishga qaratilgani qayd etildi.
Yangi talablar bilan bogʻliq savollar yuzasidan, shuningdek, shubhali holatlar yoki noqonuniy xatti-harakatlar toʻgʻrisida maʼlumotlar boʻlsa, fuqarolar Sanoat, radiatsiya va yadro xavfsizligi qoʻmitasining ishonch telefoniga murojaat qilishlari mumkin: 71 203-02-39.