Oʻzbekistonda eksportchilarni moliyaviy qoʻllab-quvvatlash shartlari oʻzgartirildi

Oʻzbekistonda eksportchilarni moliyaviy qoʻllab-quvvatlash shartlari qayta koʻrib chiqildi. Yangilangan qoidalar brend, eksport hajmi va sertifikatlashtirishga qoʻyiladigan talablarga daxldor.

2026 yil 1 noyabrdan boshlab yagona milliy stendda ishtirok etish uchun kompaniyalardan roʻyxatdan oʻtgan tovar belgisi talab qilinadi. Bundan tashqari, korxonaning oʻz veb-sayti boʻlishi kerak.

Eksportchi, shuningdek, oxirgi 12 oydagi yetkazib berish hajmini tasdiqlashi lozim boʻladi. Milliy stendda ishtirok etish uchun bu koʻrsatkich kamida 100 ming dollarni tashkil etishi kerak.

Xorijiy seminarlar, treninglar, savdo missiyalari va biznes-forumlar uchun 50 ming dollarlik chegara belgilandi. Bu talab hukumat komissiyasi, tegishli vazirlik yoki Savdo-sanoat palatasi tomonidan taqdim etiladigan kompaniyalarga taalluqli emas.

2027 yil 1 yanvargacha tadbirkorlardan tashqi savdo operatsiyalari boʻyicha muddati oʻtgan debitorlik qarzdorligi yoʻqligini tasdiqlash talab etilmaydi. Bu qoida davlat ulushi boʻlmagan korxonalar uchun jarimalarga joriy etilgan moratoriy bilan bogʻliq.

2027 yil 1 yanvardan boshlab kompaniyalar standartlarni joriy etish va sertifikatlashtirish uchun malakali konsalting tashkilotlari orqali qoʻllab-quvvatlash olishlari mumkin boʻladi. Bunday tashkilotlar maxsus onlayn-reyestrga kiritilgan boʻlishi lozim.

Yangi qoidalar, shuningdek, qoʻllab-quvvatlash shartlarini buzganlik uchun javobgarlikni ham joriy etadi. Xususan, kelishilgan xalqaro koʻrgazmada ishtirok etishdan bosh tortish BHMning 20 baravari miqdorida jarimaga sabab boʻladi.

Bundan tashqari, kompaniyaning davlat tomonidan moliyalashtiriladigan boshqa tadbirlarda ishtirok etishi olti oygacha cheklanishi mumkin.

Yangi qoidalar tadbirkorlar bilan uchrashuvlar yakunlari boʻyicha Hukumat komissiyasi tomonidan tasdiqlandi.