Oʻzbekistonda bitiruvchilarning sifat indeksi joriy etiladi. Baholashda nimalar hisobga olinadi?

Oʻzbekistonda bitiruvchilar sifati indeksi joriy etiladi. Baholashda nimalar hisobga olinadi?

Oʻzbekistonda oliy taʼlim muassasalari faoliyatini bitiruvchilari qanchalik tez ish topayotgani, ularning bandligi qanchalik barqarorligi va qancha daromad olayotganiga qarab baholash imkonini beruvchi «Bitiruvchilar sifati indeksi»ni hisoblash tartibi tasdiqlandi. Baholash yakunlariga koʻra, eng yuqori koʻrsatkichlarga ega boʻlgan 20 ta oliy taʼlim muassasasi har yili 500 million soʻm miqdorida moliyaviy qoʻllab-quvvatlanadi.

Tegishli idoraviy hujjat Adliya vazirligi tomonidan 2026 yil 31 oktyabrda roʻyxatdan oʻtkazildi.

Yangi qoidalarga koʻra, indeks toʻrtta koʻrsatkich boʻyicha hisoblanadi: bitiruvchilarning ishga joylashish tezligi, barqaror bandlik darajasi, oʻrtacha oylik daromad va bandlik kategoriyasi.

Hisobot davri 12 oy — 1 iyuldan keyingi yilning 30 iyunigacha boʻlgan muddat hisoblanadi.

Ijtimoiy reyestrga kiritilgan ijtimoiy himoyaga muhtoj toifadagi bitiruvchilar uchun alohida shartlar nazarda tutilgan. Ular uchun ishga joylashish tezligi va bandlik kategoriyasini hisoblashda maksimal oshiruvchi koeffitsiyentlar qoʻllaniladi. Bundan tashqari, bunday bitiruvchilarning barqaror bandligini baholashda ular barqaror ish bilan taʼminlangan deb hisobga olinadi.

Agar bitiruvchi bir vaqtning oʻzida bir nechta toifaga tegishli boʻlsa, indeksni hisoblashda nazarda tutilgan eng yuqori oshiruvchi koeffitsiyent qoʻllaniladi.

Indeksni joriy etish prezidentning 2026 yil 10 apreldagi farmonida nazarda tutilgan.

Buyruq loyihasida, shuningdek, toʻplangan ballarga qarab oliy taʼlim muassasalarini uchta darajaga boʻlish nazarda tutilgan. Yangi tizim 2027 yil 1 yanvardan kuchga kirishi mumkin.