Oliygohlar bitiruvchilarining ishi va maoshiga qarab baholanadi
Oʻzbekistonda oliy taʼlim tashkilotlari uchun «Bitiruvchi sifati indeksi» joriy etildi. Unda bitiruvchilarning ish bilan taʼminlangani, barqaror bandligi va oʻrtacha oylik daromadi hisobga olinadi. Yuqori natija koʻrsatgan har bir OTMga 500 mln soʻmgacha ragʻbat mablagʻi ajratilishi mumkin.
Oliygohlar bitiruvchilarning ishi va maoshiga qarab baholanadi
Vazirlar Mahkamasining 2026-yil 29-sentabrdagi 525-son qaroriga muvofiq, oliy taʼlim tashkilotlari bitiruvchilarining mehnat bozoridagi natijalari asosida baholanishi belgilangan.
Indeksni shakllantirishda bitiruvchilarning bandlik darajasi, barqaror ish bilan taʼminlangani, oʻrtacha oylik daromadi hamda boshqa tegishli koʻrsatkichlar hisobga olinadi.
Oliygohlar uch guruhga ajratiladi
Indeks natijalariga koʻra, oliy taʼlim tashkilotlari quyidagicha tasniflanadi:
«Yashil» guruh
- eng yuqori natija koʻrsatgan 30 foiz OTM;
«Sariq» guruh
- keyingi 30 foiz OTM;
«Qizil» guruh
- qolgan 40 foiz OTM.
Bu foizlar bitiruvchilarning bandlik koʻrsatkichini emas, baholash yakunida har bir guruhga kiritiladigan oliygohlar ulushini bildiradi.
Yuqori natija uchun moliyaviy ragʻbat beriladi
Indeks boʻyicha yuqori koʻrsatkichlarga erishgan oliy taʼlim tashkilotlarini moliyaviy ragʻbatlantirish ham nazarda tutilgan.
Bunda har bir OTMga 500 mln soʻmgacha mablagʻ ajratilishi mumkin.
Natijalar har yili eʼlon qilinadi
«Bitiruvchi sifati indeksi» maxsus avtomatlashtirilgan raqamli platformada shakllantiriladi. Uning natijalari har yili 1-oktabrga qadar eʼlon qilib boriladi.
Yangi baholashda oliygoh bitiruvchilarining diplom olgandan keyin mehnat bozorida qanday natijaga erishayotganiga eʼtibor qaratiladi.