Oʻzbekistonda 2027 yil 1 iyuldan oʻsimlik yogʻini majburiy markirovkalashni joriy etish taklif qilindi
Taklif etilayotgan tartibga koʻra, ishlab chiqarilayotgan va import qilinayotgan oʻsimlik yogʻi oʻroviga maxsus raqamli kod tushiriladi. Markirovkasiz mahsulot sotuvchilariga nisbatan qonunchilikda nazarda tutilgan choralar qoʻllanilishi mumkin.
Oʻzbekistonda 2027 yil 1 iyuldan oʻsimlik yogʻini majburiy markalashni joriy etish taklif qilindi
Oʻzbekistonda 2027 yil 1 iyuldan boshlab oʻsimlik yogʻini majburiy raqamli markalash tizimini joriy etish rejalashtirilmoqda. Bu haqda Soliq qoʻmitasi jamoatchilik muhokamasiga qoʻygan Vazirlar Mahkamasi qarori loyihasida aytiladi.
Hujjat normativ-huquqiy hujjatlar loyihalarini muhokama qilish portaliga 9 oktyabr kuni joylashtirilgan. Muhokama 24 oktyabrgacha davom etadi.
Loyihaga koʻra, oʻsimlik yogʻini ishlab chiqarish, import qilish, ulgurji va chakana sotish bilan shugʻullanuvchi kompaniyalar «Asl belgisi» milliy axborot tizimiga ulanishi kerak boʻladi. Ular ushbu tizim orqali markalangan mahsulotni muomalaga kiritish, uni savdo jarayonida harakatlantirish va muomaladan chiqarish toʻgʻrisidagi maʼlumotlarni uzatishga majburdirlar.
Oʻsimlik yogʻi oʻramiga GS1 DataMatrix formatidagi maxsus ikki oʻlchamli kodni tushirish taklif etilmoqda. Uni bevosita oʻramning oʻziga chop etish yoki qayta foydalanish mumkin boʻlmagan maxsus yorliq yordamida yopishtirish mumkin boʻladi.
Bunda raqamli kod isteʼmolchi uchun koʻrinadigan joyda joylashishi va oʻramni ochmasdan skanerlash uchun ochiq boʻlishi kerak. U oʻramning oʻlchami kamida 10x10 millimetr boʻlgan maxsus kontrast joyiga tushiriladi. Qaror loyihasida majburiy markalanishi kerak boʻlgan oʻsimlik yogʻini markasiz sotish savdo qoidalarini buzish hisoblanishi koʻrsatilgan. Bunday hollarda qonunchilikka muvofiq choralar koʻriladi.
Shuningdek, «Asl belgisi» tizimi operatori — «CRPT Turon» MCHJ Soliq qoʻmitasi bilan birgalikda 2027 yil 1 yanvargacha roʻyxatdan oʻtgan va tegishli shartnomani imzolagan ishlab chiqaruvchilar hamda import qiluvchilarni markalash kodlariga buyurtma berishni boshqarish uskunalari bilan taʼminlashi nazarda tutilgan.
Hujjatda yangi tartibning asosiy maqsadlari sifatida oʻsimlik yogʻini noqonuniy olib kirish, ishlab chiqarish va sotish holatlarining oldini olish, shuningdek, mahsulot muomalasini raqamlashtirish qayd etilgan. Hozircha ushbu tartib tasdiqlanmagan, loyiha jamoatchilik muhokamasi bosqichida turibdi.