Oʻzbekiston va Vengriya farmatsevtika sohasidagi hamkorlikni kengaytiradi

Oʻzbekiston va Vengriya farmatsevtika sohasidagi hamkorlikni kengaytirish niyatida

Oʻzbekiston va Vengriya farmatsevtika tarmogʻida hamkorlikni kengaytirish istiqbollarini, jumladan, investitsiyalarni jalb qilish, zamonaviy texnologiyalarni joriy etish va qoʻshma loyihalarni ishga tushirishni muhokama qildi. Bu haqda Tibbiyot va farmatsevtika tarmogʻini rivojlantirish agentligi xabar bermoqda.

8 sentyabr kuni Vengriyaning Oʻzbekistondagi Favqulodda va Muxtor Elchisi Yojef Roja Tibbiyot va farmatsevtika tarmogʻini rivojlantirish agentligi direktori Abdulla Azizov bilan uchrashuv oʻtkazdi.

Tashrif doirasida vengriyalik diplomat Agentlik, Farmatsevtika texnik universiteti va BioPharma City farmatsevtika klasteri faoliyati bilan tanishdi. Tarmoq vakillari, shuningdek, klasterda amalga oshirilayotgan loyihalar va uning istiqboldagi rejalari haqida soʻzlab berdilar.

Bundan tashqari, elchining Abu Ali ibn Sino nomidagi ixtisoslashtirilgan maktab oʻquvchilari bilan alohida uchrashuvi boʻlib oʻtdi. Suhbat davomida oʻquvchilar ilm-fanga boʻlgan qiziqishlari bilan oʻrtoqlashdilar va kelajakdagi rejalari haqida gapirib berdilar.

Muzokaralarning asosiy mavzusi farmatsevtika sohasida Oʻzbekiston-Vengriya hamkorligini yanada rivojlantirish boʻldi. Tomonlar investitsiyalarni jalb qilish, zamonaviy texnologiyalarni joriy etish va qoʻshma loyihalarni amalga oshirish imkoniyatlarini muhokama qildilar.

Uchrashuv yakunlari boʻyicha Oʻzbekiston va Vengriya oʻrtasida farmatsevtika sohasida amaliy hamkorlikni rivojlantirish uchun yangi imkoniyatlar belgilab olindi.

Keltirilgan maʼlumotlarga koʻra, 2025 yil yakunlari boʻyicha Vengriyaning dori vositalari va farmatsevtika mahsulotlari eksporti qariyb 9,9 mlrd yevroni tashkil etdi.