Oʻzbekiston va TDT davlatlari ilk kosmik bitimni imzoladilar
Oʻzbekiston, Ozarbayjon, Qozogʻiston va Turkiya kosmik sohada hamkorlikni kengaytirishga kelishib oldilar. Tegishli hujjatni toʻrt mamlakat vakillari Antaliyada 77-Xalqaro astronavtika kongressi doirasida imzoladilar.
6 oktyabr kuni imzolangan kelishuv Turkiy davlatlar tashkiloti doirasida mamlakatlar oʻrtasida kosmik tarmoqda imzolangan ilk hamkorlik hujjati boʻldi.
Tomonlar kosmik texnologiyalar, sunʼiy yoʻldoshlar, ilmiy tadqiqotlar va sanoat hamkorligi sohasida qoʻshma loyihalarni rivojlantirishni rejalashtirmoqda. Ushbu tarmoq uchun mutaxassislar tayyorlashga alohida eʼtibor qaratiladi.
Turkiy davlatlar tashkilotida yangi hujjat mamlakatlar oʻrtasida yanada yaqin hamkorlik va qoʻshma kosmik tashabbuslarni kengaytirish uchun asos yaratishini taʼkidladilar. Xususan, gap OTS-SAT loyihasi tajribasini rivojlantirish haqida bormoqda.
Antaliyadagi kongress ishida Raqamli texnologiyalar vaziri Sherzod Shermatov boshchiligidagi Oʻzbekiston delegatsiyasi ishtirok etmoqda. Mamlakat vakillari xalqaro kosmik hamjamiyat ishtirokchilari bilan uchrashuvlar oʻtkazib, xalqaro aloqalarni rivojlantirish va hamkorlikning yangi yoʻnalishlarini muhokama qilmoqdalar.
Xalqaro astronavtika kongressi Antaliyada 5–9 oktyabr kunlari boʻlib oʻtmoqda va unda 100 dan ortiq mamlakatdan kosmik agentliklar, ilmiy tashkilotlar, davlat tuzilmalari va xususiy kompaniyalar vakillari toʻplangan.
Shu bilan birga, navbatdagi, 79-Xalqaro astronavtika kongressi Oʻzbekistonda boʻlib oʻtadi. Samarqand unga 2028 yil 9–13 oktyabr kunlari mezbonlik qiladi.