Oʻzbekiston va Ozarbayjon konsullik hamkorligini muhokama qildilar

Oʻzbekiston va Ozarbayjon Bokuda konsullik maslahatlashuvlarining toʻrtinchi bosqichini oʻtkazdi, unda fuqarolarning huquqlari va qonuniy manfaatlarini himoya qilish, migratsiya masalalari va tegishli idoralar oʻrtasidagi yaqin hamkorlikka eʼtibor qaratildi.

«Dunyo» axborot agentligi xabariga koʻra, muhokamalarda ikki mamlakat konsullik xizmatlari oʻrtasidagi hamkorlikning hozirgi holati va istiqbollariga ham toʻxtalib oʻtildi, bunda Oʻzbekiston va Ozarbayjon fuqarolarining huquqlarini himoya qilishga alohida urgʻu berildi.

Kun tartibidan migratsiya, adliya, statistik maʼlumotlar almashish va ikki tomonlama munosabatlarni tartibga soluvchi huquqiy bazani takomillashtirish masalalari oʻrin oldi. Tomonlar tegishli davlat idoralari oʻrtasida toʻgʻridan-toʻgʻri aloqalarni mustahkamlash muhimligini taʼkidladilar.

Konsullik xizmatlari rahbarlari Oʻzbekiston va Ozarbayjon oʻrtasidagi strategik sheriklik va ittifoqchilik munosabatlarini rivojlantirishda erishilgan ijobiy dinamikani qayd etdilar. shuningdek, ikki mamlakat tashqi ishlar vazirliklari oʻrtasidagi doʻstona aloqalar va amaliy hamkorlikni yanada mustahkamlash zarurligini taʼkidladilar.

Tashrif doirasida Oʻzbekiston Tashqi ishlar vazirligi delegatsiyasi Ozarbayjonda istiqomat qilayotgan Oʻzbekiston fuqarolari bilan uchrashdi.

Konsullik xodimlari tomonidan Oʻzbekiston fuqaroligi, migratsiya, mehnat faoliyati va taʼlim bilan bogʻliq dolzarb masalalar boʻyicha tushuntirishlar berildi.