Oʻzbekiston va Koreya milliardlab dollarlik 120 ta loyihadan iborat portfelni shakllantirdi
Oʻzbekiston va Janubiy Koreya umumiy qiymati qariyb 4 milliard dollarlik 120 ta loyihadan iborat portfelni shakllantirdi.
Yangi tashabbuslar Seulda Oʻzbekiston Prezidenti ishtirokida oʻtkazilgan Oʻzbekiston-Koreya biznes-forumi doirasida muhokama qilindi. Forumda ikki mamlakat davlat tuzilmalari va biznesining 300 dan ortiq vakillari, jumladan, yirik sanoat korxonalari, savdo kompaniyalari va moliyaviy tashkilotlar rahbarlari ishtirok etdi.
Asosiy eʼtibor investitsiyaviy va texnologik hamkorlikni kengaytirishga qaratildi. Oʻzbekiston yangi ishlab chiqarishlarni va qoʻshma loyihalarni yoʻlga qoʻyish uchun oʻzining resurs bazasini, Koreya texnologiyalarini hamda ikki mamlakat kompaniyalari kapitalini birlashtirishni taklif qildi.
Istiqbolli yoʻnalishlar sanoat, energetika, transport infratuzilmasi, raqamli texnologiyalar, mikroelektronika, biotexnologiyalar va boshqa sohalarni qamrab oladi. Oʻzbekiston, shuningdek, har bir loyihani amalga oshirish uchun zarur sharoitlarni yaratishga tayyorligini maʼlum qildi.
Shuningdek, Oʻzbekiston va Janubiy Koreya alohida strategik sheriklikni yangi bosqichga olib chiqishga kelishib olgani taʼkidlandi.