Oʻzbekiston va Armaniston huquqiy axborot sohasida hamkorlik toʻgʻrisida memorandum imzoladilar
Oʻzbekiston va Armaniston huquqiy axborot sohasida hamkorlik toʻgʻrisida memorandum imzoladilar
Armaniston Adliya vazirligi huzuridagi «Rasmiy xabarnoma» yopiq aktsiyadorlik jamiyati delegatsiyasi tajriba almashish va istiqbolli qoʻshma loyihalarni muhokama qilish maqsadida Oʻzbekiston Adliya vazirligi huzuridagi «Adolat» milliy huquqiy axborot markaziga tashrif buyurdi. Tashrifning asosiy mavzusi huquqiy axborotga ishlov berish va uni tarqatish, jumladan, qonunchilik hujjatlarini tizimlashtirish, mohiyati boʻyicha ishlov berish va tarjima qilish, shuningdek, foydalanuvchilarga huquqiy axborotdan foydalanish imkoniyatini yaratishda raqamli texnologiyalarni qoʻllash sohasidagi hamkorlik boʻldi.
Uchrashuvlar davomida Armaniston delegatsiyasi aʼzolariga «Adolat» markazi faoliyati hamda normativ-huquqiy hujjatlarga huquqiy va texnik ishlov berish tartib-taomillari haqida maʼlumot berildi. Tomonlar, shuningdek, ushbu sohada hozirda qoʻllanilayotgan axborot texnologiyalarini koʻrib chiqdilar. Tashrif doirasida «Adolat» milliy huquqiy axborot markazi va Armanistonning «Rasmiy xabarnoma» tashkiloti oʻrtasida anglashuv memorandumi imzolandi. Hujjat huquqiy axborot sohasida ikki tomonlama hamkorlikni mustahkamlash va qonunchilik maʼlumotlar bazalarini texnik modernizatsiya qilishni nazarda tutadi.
Memorandum, shuningdek, qonunchilik hujjatlarini tarjima qilish va nashr etish sohasidagi hamkorlikni ham oʻz ichiga oladi. Armaniston delegatsiyasi aʼzolari normativ-huquqiy hujjatlarga huquqiy va texnik ishlov berish uchun masʼul boʻlimlar faoliyati bilan tanishdilar. Ular qonunchilikni tizimlashtirish va unga ishlov berish tartib-taomillarini oʻrganib, markazning amaldagi ish uslublari bilan tanishdilar.