Oʻzbekiston toʻqqiz oyda $44,3 mlrd xorijiy investitsiyalarni oʻzlashtirdi
2026 yilning yanvar–sentyabr oylarida Oʻzbekistonda qiymati 3,8 mlrd dollarlik 106 ta yirik investitsiya loyihasi amalga oshirildi, 13,8 mingta ish oʻrni yaratildi.
Oʻzbekiston toʻqqiz oyda 44,3 mlrd dollarlik xorijiy investitsiyalarni oʻzlashtirdi
Oʻzbekistonda 2026 yilning yanvar–sentyabr oylarida 44,3 mlrd dollarlik xorijiy investitsiyalar va kredit mablagʻlari oʻzlashtirildi. Ushbu davrda umumiy qiymati 3,8 mlrd dollar boʻlgan 106 ta yirik loyiha foydalanishga topshirildi, ular doirasida 13,8 mingta ish oʻrni yaratildi.
Bu haqda Investitsiyalar, sanoat va savdo vaziri Laziz Qudratovning Oliy Majlis Qonunchilik palatasining hududlarda xorijiy investitsiyalar ishtirokidagi loyihalar amalga oshirilishini monitoring qilish, ularning samaradorligini baholash va investorlar bilan hamkorlikni takomillashtirishga oid parlament soʻroviga bergan javobida aytiladi.
Taqdim etilgan maʼlumotlarga koʻra, investitsiya loyihalari amalga oshirilishining raqamli monitoringi olib borilmoqda. U loyihalarni bajarish jarayonida yuzaga keladigan muammolarni oʻz vaqtida aniqlashga qaratilgan.
Bundan tashqari, maxsus iqtisodiy zonalarni boshqarishni takomillashtirish va davlat kafolati ostida jalb qilingan xorijiy kreditlardan foydalanish samaradorligini oshirish boʻyicha choralar koʻrilmoqda.
Maxsus iqtisodiy zonalar faoliyatining huquqiy bazasini takomillashtirish doirasida yangi tahrirdagi «Maxsus iqtisodiy zonalar toʻgʻrisida»gi qonun loyihasi tayyorlandi. shuningdek, eksportchilarni qoʻllab-quvvatlash choralari bosqichma-bosqich Oʻzbekistonning xalqaro savdo majburiyatlariga muvofiqlashtirilmoqda.
Javobni koʻrib chiqishda deputatlar investitsiya faoliyati samaradorligini nafaqat oʻzlashtirilgan mablagʻlar hajmi, balki qoʻshilgan qiymat yaratish, barqaror bandlikni taʼminlash, mahalliy korxonalar bilan kooperatsiyani rivojlantirish va aholi farovonligiga taʼsiri boʻyicha ham baholash zarurligini taʼkidladilar.
Shu munosabat bilan hududlarning salohiyati va ixtisoslashuvini hisobga olgan holda iqtisodiy qaytishi yuqori boʻlgan loyihalarni tanlab olish, mahalliy korxonalar bilan ishlab chiqarish aloqalarini mustahkamlash va investitsiya tashabbuslarini aniq natijalarga erishishga yoʻnaltirish boʻyicha takliflar ilgari surildi.
Deputatlar ushbu sohadagi parlament nazorati qonunchilik ijrosini oʻrganish, mavjud muammolarni aniqlash va masʼul davlat organlari ishining samaradorligini oshirish imkonini berishini qayd etdilar.
Parlament soʻroviga berilgan javobni koʻrib chiqish yakunlari boʻyicha tegishli qaror qabul qilindi.