Oʻzbekiston Qobul aeroporti yaqinida turar joy majmuasi qurishi mumkin

Oʻzbekiston Qobul aeroporti yaqinida turar joy kompleksi barpo etishi mumkin

Oʻzbekiston Afgʻonistonga qurilish va infratuzilma sohalarida bir qator loyihalarni ilgari surdi. Ular orasida — Qobul xalqaro aeroporti yaqinidagi 60 gektar maydonda turar joy va jamoat kompleksi, shuningdek, Afgʻoniston poytaxtida biznes markazi va turar joy binolari bor.

Tashabbuslarni "O‘zshaharsozlik LITI" bosh direktori Bobur Elmurodov boshchiligidagi Oʻzbekiston delegatsiyasi Afgʻoniston Shaharni rivojlantirish va uy-joy qurilishi vazirining moliyaviy masalalar boʻyicha oʻrinbosari Nasih Rabboniy va boshqa mutaxassislar bilan uchrashuvda taqdim etdi.

Qobuldagi obʼyektlardan tashqari, Oʻzbekiston tomoni Hayraton sanoat zonasida loyihalarni amalga oshirishni taklif qildi. Mozori Sharifda esa Oʻzbekistonga sifatli goʻsht mahsulotlari yetkazib berish uchun goʻshtni qayta ishlash klasterini tashkil etish ham rejalashtirilmoqda.

Afgʻoniston vakillari mamlakatda Oʻzbekiston kompaniyalari faoliyati uchun sharoit yaratishga tayyor ekanliklarini bildirdilar. Uchrashuv yakunlari boʻyicha, shuningdek, Qobulda "O‘zshaharsozlik LITI" vakolatxonasini ochish va afgʻonistonlik mutaxassislarni qurilish kasblariga oʻqitishni tashkil etish taklif qilindi.

Oktyabr oyida Oʻzbekiston delegatsiyasi Afgʻonistonning tegishli vazirligi bilan muzokaralarni davom ettirish va Qobuldagi qurilish maydonchalarini, jumladan, "Yangi Qobul" loyihasi bilan bogʻliq joylarni borib koʻrishni rejalashtirmoqda.

Avvalroq Oʻzbekiston Madaniy meros agentligi delegatsiyasi mintaqa tarixi va madaniyati bilan bogʻliq tarixiy yodgorliklar ahvolini baholash uchun Afgʻonistonga tashrif buyurgan edi. Tomonlar ularni saqlash va qayta tiklashga oʻzbekistonlik mutaxassislarni jalb etishni muhokama qildilar.