Oʻzbekiston Osiyo oʻyinlarida 42 ta sport turida ishtirok etadi

Oʻzbekiston Osiyo oʻyinlarida 42 ta sport turida ishtirok etadi

Toshkentda Oʻzbekiston terma jamoasining Aichi–Nagoya-2026 Osiyo va Para Osiyo oʻyinlariga tayyorgarligiga bagʻishlangan matbuot anjumani boʻlib oʻtdi. Sport vazirligi va Milliy Paralimpiya qoʻmitasi vakillari delegatsiya tarkibi, mamlakat uchun yangi boʻlgan sport yoʻnalishlari va boʻlajak musobaqalardan kutilayotgan natijalar haqida gapirib berdilar.

Osiyo oʻyinlarida Oʻzbekiston 42 ta sport turida ishtirok etadi. Ulardan 36 tasi olimpiya dasturiga kiritilgan. Ilk bor oʻzbekistonlik sportchilar sohil voleyboli, voleybol, yelkanli sport, skvosh va MMA boʻyicha bahslarga kirishadilar.

Sport vaziri oʻrinbosari Shahrullo Mahmudov sportchilar jiddiy tayyorgarlikdan oʻtganliklari va Yaponiyadagi chiqishlarga tayyor ekanliklarini taʼkidladi. Uning soʻzlariga koʻra, ob-havo sharoiti jamoa uchun toʻsiq boʻlmasligi kerak, chunki sportchilar dastlab raqiblari bilan bir xil sharoitda boʻladilar, Oʻzbekiston delegatsiyasi uchun esa zarur sharoitlar yaratilgan.

Medallar istiqboli haqidagi savolga javob berar ekan, Mahmudov barcha toifalarda — ustuvor, istiqbolli va rivojlanayotgan sport turlarida muvaffaqiyatga umid qilish mumkinligini aytdi. Shu bilan birga, matbuot anjumanida medallar soni boʻyicha aniq prognoz tilga olinmadi.

Para Osiyo oʻyinlarida Oʻzbekiston terma jamoasi 11 ta sport turida ishtirok etadi. Ilk bor mamlakatimiz parasportchilari para-qilichbozlik, para-kamondan otish va bochcha musobaqalarida qatnashadilar.

Milliy Paralimpiya qoʻmitasi raisi oʻrinbosari Hikmat Toshmatov Oʻyinlar oldidan parasportchilar uchun oʻquv-mashgʻulot yigʻinlari oʻtkazilganini maʼlum qildi. Uning soʻzlariga koʻra, mamlakat uchun yangi boʻlgan sport yoʻnalishlari faol rivojlanmoqda, jamoa esa munosib natija koʻrsatishga umid qilmoqda.

Jurnalistlar gandbol musobaqalarida Oʻzbekiston nomidan nega faqat ayollar terma jamoasi ishtirok etishi bilan alohida qiziqdilar. Shahrullo Mahmudov bu qaror federatsiya bilan birgalikda qabul qilinganini tushuntirdi: mutaxassislarning baholashiga koʻra, ayollar jamoasida muvaffaqiyatli natijaga erishish imkoniyati koʻproq.

Aichi–Nagoya-2026 Osiyo va Para Osiyo oʻyinlari oʻzbekistonlik sportchilar uchun navbatdagi yirik qitʼa startiga aylanadi, unda mamlakat ham anʼanaviy, ham oʻzi uchun yangi sport turlarida ishtirok etadi.