Oʻzbekiston oliy oʻquv yurtlarida talabalar davomati, xavfsizligi va bandligini nazorat qilishning yagona tizimi joriy etiladi
Toshkent talabalar shaharchasida davomat, oliy oʻquv yurtlari va yotoqxonalarga kirish-chiqish, huquqbuzarliklar, bandlik hamda shartnomalar bilan bogʻliq muammolar toʻgʻrisidagi maʼlumotlarni birlashtiruvchi tizim sinovdan oʻtkazilmoqda. Yil yakuniga qadar uni poytaxtning boshqa tumanlariga, 2027 yilda esa mamlakatdagi barcha oliy oʻquv yurtlariga joriy etish rejalashtirilgan.
Oʻzbekiston oliy oʻquv yurtlarida talabalar davomati, xavfsizligi va bandligini nazorat qilishning yagona tizimi joriy etiladi
Oʻzbekiston oliy taʼlim muassasalarida talabalar shaharchalarini boshqarishning yagona tizimini yaratish va xavfsizlikni kuchaytirish rejalashtirilmoqda. Bu haqda 11 sentyabr kuni Prezident Shavkat Mirziyoyev raisligida oʻtkazilgan yigʻilishda soʻz bordi.
Hukumat maʼlumotlariga koʻra, Olmazor tumanida bir vaqtning oʻzida 75 ming talaba tahsil olmoqda. Yettita oliy oʻquv yurtining 41 ta yotoqxonasida 18 mingga yaqin yoshlar istiqomat qiladi.
Yashash sharoitlarini boshqarish, yotoqxonalar atrofidagi hududlarni obodonlashtirish, yashil hududlar va buk-kafelarni rivojlantirish, shuningdek, madaniy tadbirlarni tashkil etish uchun alohida direktsiya tashkil etish rejalashtirilgan.
Bundan tashqari, «yoshlar» shaharchasida talabalar taʼlim-tarbiyasi, ularning bandligi, ijtimoiy qoʻllab-quvvatlanishi va xotin-qizlar masalalari boʻyicha alohida masʼullar paydo boʻladi.
«Hozir har bir oliy oʻquv yurtida xizmat koʻrsatish va boshqaruv turlicha tashkil etilgan boʻlib, bu ortiqcha mehnat va xarajatlarga olib kelmoqda. Shu bois bu yerda yagona direktsiya tashkil etish va xorijiy, jumladan, Yevropa universitetlari tajribasi asosida „aqlli“ boshqaruv tizimini joriy etish zarur», — dedi u.
Vazirning soʻzlariga koʻra, yangi tizimning asosiy vazifalaridan biri — yoshlar oʻrtasida jinoyatchilikning oldini olishdir.
«Hozirda xavfsizlik masalalariga alohida eʼtibor qaratilmoqda. Prezidentga „Xavfsiz shahar“, „Xavfsiz talabalar shaharchasi“ vaziyatlar markazi taqdim etildi. Talabalar shaharchasida jinoyatchilikni kamaytirish maqsadida „aqlli“ kameralar oʻrnatiladi va hududdagi har qanday huquqbuzarliklarni nazorat qilish imkonini beruvchi tizim yaratiladi», — dedi Sharipov.
Birinchi bosqichda loyiha talabalar shaharchasidagi toʻrtta universitetni qamrab oladi.
Sharipov, shuningdek, jinoyatchilik, darslarga davomat, shartnoma toʻlovlaridagi muammolar, talabalarning ishga joylashishi va bandligi toʻgʻrisidagi maʼlumotlarni birlashtiruvchi yagona platforma yaratilishi haqida maʼlum qildi. «Prezident loyihani maʼqulladi. Kelajakda ushbu platformani barcha oliy taʼlim muassasalarini qamrab oluvchi yagona tizimga aylantirish rejalashtirilgan», — dedi vazir.
2025/2026 oʻquv yili boshida Oʻzbekistondagi 202 ta oliy oʻquv yurtida kunduzgi taʼlim shaklida 741,5 ming talaba tahsil olayotgan edi. Ulardan 441 mingga yaqini oʻz uyida yoki qarindoshlarinikida, 146 mingi yotoqxonalarda, jumladan, DXSh asosida qurilgan yotoqxonalarda yashagan. Yana 152 mingdan ortiq talaba yoki qariyb 20,5 foizi ijarada turgan.