Oʻzbekiston Markaziy banki 2027 yilda iqtisodiyotning 7–7,5 foizga oʻsishini prognoz qilmoqda
Markaziy bank inflyatsiyaning 2027 yilning ikkinchi yarmida maqsadli 5% gacha pasayishini kutmoqda va qatʼiy pul-kredit sharoitlarini saqlab qolish niyatida.
Oʻzbekiston MB 2027 yilda iqtisodiyotning 7–7,5% ga oʻsishini kutmoqda
Oʻzbekiston Markaziy banki 2027 yilda iqtisodiyotning 7–7,5% ga va 2028–2029 yillarda 6,5–7,5% ga oʻsishini prognoz qilmoqda. Regulyatorning bazaviy stsenariysiga koʻra, inflyatsiya 2027 yilning ikkinchi yarmida 5% lik maqsadli darajagacha tushishi, keyin esa keyingi ikki yil davomida taxminan ushbu qiymat atrofida ushlanib turishi kerak.
2026 yil 4 noyabrda Markaziy bank boshqaruvi 2027 yil va 2028–2029 yillar davriga moʻljallangan Pul-kredit siyosatining asosiy yoʻnalishlari kontseptual loyihasini tasdiqladi. Hujjatda makroiqtisodiy rivojlanish prognozlari, potentsial xavf-xatarlar bahosi va narxlar barqarorligini saqlash boʻyicha chora-tadbirlar taqdim etilgan.
Bazaviy stsenariyda tashqi va ichki iqtisodiy sharoitlarning bosqichma-bosqich tenglashishi nazarda tutilgan. Xususan, regulyator geosiyosiy taranglik va neft narxlarining ehtimoliy pasayishidan, shuningdek, Oʻzbekistonning asosiy savdo hamkorlarida moʻʼtadil oʻsish surʼatlari saqlanib qolishidan kelib chiqadi.
Ichki shart-sharoitlarga umumiy fiskal defitsitni YASHOʻning taxminan 3% darajasida ushlab turish, kreditlash va ichki talabning mutanosib kengayishi, tartibga solinadigan narxlar islohotini yakunlash va prognoz gorizonti doirasida Oʻzbekistonning Jahon savdo tashkilotiga aʼzo boʻlishi kiritilgan.
Markaziy bank baholashiga koʻra, bazaviy inflyatsiya 2027 yilda 4–5% gacha pasayishi mumkin. Narxlar oʻsishini jilovlaydigan omillar qatorida energiya resurslari va kommunal xizmatlar tariflarining avvalgi oshirilishidan kelib chiqqan toʻgʻridan-toʻgʻri effektning yakunlanishi, tashqi narx bosimining susayishi va ichki taklifning ortishi qayd etilgan.
Regulyator 2026–2027 yillarda qaʼtiy pul-kredit sharoitlarini saqlab qolishni rejalashtirmoqda. Prognozga koʻra, 2027 yilda pul bozoridagi UZONIA real stavkasi taxminan 6–7% ni tashkil etadi. Ushbu siyosat ichki talabni cheklash, inflyatsiya kutilmalarini pasaytirish va milliy valyutadagi jamgʻarmalar jozibadorligini qoʻllab-quvvatlash imkonini berishi kutilmoqda.
Pul-kredit sharoitlarini bosqichma-bosqich yumshatish masalasi inflyatsiyaning maqsadli daraja atrofida barqaror mustahkamlanishi uchun shart-sharoitlar paydo boʻlganidan keyin koʻrib chiqiladi. Agar narxlar bosimi kuchaysa yoki narxlar oʻsishining ikkilamchi effektlari yaqqolroq namoyon boʻlsa, qaʼtiy siyosat uzoqroq saqlanishi mumkin.
Markaziy bank, shuningdek, tashqi va ichki sharoitlarning yomonlashuvi ehtimoli bilan bogʻliq muqobil stsenariylarni ham tahlil qildi. Asosiy xavf-xatarlar qatorida asosiy savdo hamkorlari valyutalarining sezilarli qadrsizlanishi, jahonda neft va oziq-ovqat narxlarining keskin oshishi, shuningdek, bank sektorida raqobatning kuchayishi fonida kreditlashning tezlashishi qayd etilgan. Ushbu omillarning yuzaga kelishi inflyatsiyaning bazaviy prognozdan yuqori boʻlishiga olib kelishi mumkin.
Hujjatning alohida boʻlimi pul-kredit siyosati samaradorligini oshirishga bagʻishlangan. 2027–2029 yillarda Markaziy bank Pul-kredit siyosati strategiyasi va uni amalga oshirish boʻyicha "yoʻl xaritasi"ni ishlab chiqish, bank tizimi likvidligini boshqarishni takomillashtirish, foiz koridorini qayta koʻrib chiqish va UZONIA’ning pul bozori moʻljali sifatidagi rolini kuchaytirishni maqsad qilgan.
Shuningdek, shariat tamoyillarini hisobga olgan holda islom banklari uchun likvidlik taqdim etish va jalb qilish instrumentlarini ishlab chiqish nazarda tutilgan. Regulyator makroiqtisodiy tahlil va prognozlash tizimlarini modernizatsiya qilish, ehtimollik modellari va muqobil stsenariylardan foydalanishni kengaytirishni rejalashtirmoqda.
Boshqa ustuvor yoʻnalishlar qatorida pul va moliya bozorlarini, derivativlar bozorini va foiz hamda valyuta xavf-xatarlarini hedjirlash instrumentlarini rivojlantirish, shuningdek, ichki valyuta bozori likvidligini oshirish oʻrin olgan.
Bundan tashqari, pul-kredit siyosati kommunikatsiyasining umumiy strategiyasini tayyorlash belgilangan. U asosiy stavka boʻyicha qarorlar, inflyatsiya prognozlari va xavf-xatarlarni baholashning shaffofligini oshirishi, shuningdek, Markaziy bankning inflyatsiyaning maqsadli darajasiga erishishdagi hisobdorligini kuchaytirishi kerak.
Siyosatning asosiy yoʻnalishlari kontseptual loyihasi Oʻzbekiston Markaziy bankining rasmiy veb-saytida joylashtiriladi va kelib tushgan takliflar hisobga olingan holda puxta ishlab chiqiladi.