Markaziy bank: 2027-yilda inflyasiya 5 foizga tushishi kutilmoqda
2026-yil birinchi yarmida iqtisodiyot 8,5 foiz o‘sdi, inflyasiya 6,4 foizga tushdi va Markaziy bank 2027-yil
Markaziy bank: 2027-yilda inflyasiya 5 foizga tushishi kutilmoqda
Markaziy bankning 2026-yil ikkinchi chorak uchun pul-kredit siyosati sharhida yilning birinchi yarmida real iqtisodiy o‘sish 8,5 foizga yetgani qayd etilgan.
Aholi daromadlari 9,2 foizga, real ish haqi 10,8 foizga oshgan. Turistlar oqimi qariyb 25 foizga ko‘paygani talabni qo‘llab-quvvatlagan. Asosiy kapitalga investitsiyalar ham real hisobda 17,5 foizga o‘sgan. Bunda sanoat, energetika, infratuzilma va qurilishdagi yirik loyihalar ta’siri qayd etilgan.
Iqtisodiyotda ishlab chiqarish tafovuti ijobiy qolgan va yalpi talab joriy taklif salohiyatidan yuqori bo‘lgan. Davlat budjeti birinchi yarim yillikni 1,8 trln so‘m profitsit bilan yakunlagan.
Iyun oyida umumiy inflyasiya yil boshidagi darajaga nisbatan pasayib, 6,4 foizni tashkil etgan. Bazaviy inflyasiya esa 5,7 foiz atrofida saqlangan.
Narxi 5 foizdan yuqori o‘sgan tovar va xizmatlar ulushi qisqarishi to‘xtagan. Bu bazaviy inflyasion bosimlar hali susaymaganini ko‘rsatgan. Aholining inflyasion kutilmalari 10,1 foiz, biznes kutilmalari 9,9 foiz bo‘lib, har ikki ko‘rsatkich umumiy inflyasiyadan yuqori shakllangan.
2026-yil 29-iyuldagi yig‘ilishda Markaziy bank asosiy stavkani 14 foiz darajasida o‘zgarishsiz qoldirgan. Inflyasiya pasayishi hisobiga chorak yakuniga kelib real asosiy stavka 7,1 foizga oshgan.
Bazaviy prognozga ko‘ra, 2026-yil yakunida inflyasiya 6,5 foizni tashkil etadi. 2027-yilda esa uni 5 foizlik maqsadli ko‘rsatkichgacha tushirish va shu darajada barqarorlashtirish kutilmoqda. Bazaviy inflyasiya 2026-yil oxirida 6 foiz, 2027-yilda 4,7 foiz atrofida bo‘lishi prognoz qilingan.
Shu bilan birga, 2026-yil uchun iqtisodiy o‘sish prognozi 7–7,5 foizdan 7,5–8 foizga oshirilgan. Oltindan tashqari eksport o‘sishi prognozi ham 12–16 foizdan 19–23 foizga yuqoriga qayta ko‘rib chiqilgan.
Markaziy bank inflyasiya bo‘yicha xatarlar muvozanati yuqori darajaga og‘ganini qayd etgan. Ortiqcha talab, yuqori inflyasion kutilmalar, energiya va oziq-ovqat narxlarining oshishi hamda global moliyaviy sharoitlarning qat’iy saqlanishi inflyasiyaga bosim o‘tkazishi mumkin.