Oʻzbekiston maʼlumotlar sizib chiqishi boʻyicha Markaziy Osiyo davlatlari uchligiga kirdi
Oʻzbekistonda 15 mln. qator sizib chiqqan maʼlumotlar qayd etildi, mamlakat esa bazalar eʼlon qilinishi soni boʻyicha Markaziy Osiyoda ikkinchi oʻrinni egalladi.
Oʻzbekiston maʼlumotlar sizib chiqishi boʻyicha Markaziy Osiyo davlatlari uchligiga kirdi
Oʻzbekistonda 2025 yil va 2026 yilning birinchi yarmida kompaniyalar va davlat tashkilotlarining sizib chiqqan maʼlumotlar bazalaridan qariyb 15 mln. qator maʼlumot xavf ostida qoldi.
Ushbu koʻrsatkich boʻyicha mamlakat Markaziy Osiyoda Tojikiston va Qozogʻistondan keyin uchinchi oʻrinni egalladi, deyiladi F6 2025-2026 Cyber Threat Landscape Report hisobotida.
Koʻrsatilgan davrda F6 butun dunyo boʻylab maʼlumotlar bazalari sizib chiqishiga oid 164 ta noyob nashr natijasida xavf ostida qolgan 600 mln.dan ortiq foydalanuvchi yozuvlarini aniqladi. Ulardan 91 ta baza xakerlik forumlari va Telegram-kanallarida ochiq foydalanish uchun joylashtirilgan, yana 73 ta baza sotuvga qoʻyilgan.
Markaziy Osiyo mamlakatlari hissasiga 257 mln qator xavf ostida qolgan maʼlumotlar toʻgʻri keldi, bu aniqlangan sizib chiqishlar umumiy hajmining uchdan bir qismidan koʻprogʻini tashkil etadi.
Sizib chiqqan yozuvlar soni boʻyicha mintaqada Tojikiston yetakchi boʻldi — qariyb 217 mln qator yoki Markaziy Osiyoda qayd etilgan umumiy maʼlumotlar hajmining 84 foizi. Qozogʻiston taxminan 25 mln qator yoki 10 foiz bilan ikkinchi oʻrinni egalladi. Oʻzbekiston hissasiga qariyb 15 mln qator toʻgʻri keldi, bu mintaqaviy hajmning 6 foiziga toʻgʻri keladi.
Shu bilan birga, maʼlumotlar bazalari nashrlari soni boʻyicha vaziyat farq qiladi. Markaziy Osiyodagi barcha sizib chiqish nashrlarining 57 foizi Qozogʻistonga, 29 foizi Oʻzbekistonga, 14 foizi esa Tojikistonga toʻgʻri keldi.
F6 kompaniyasida taʼkidlashlaricha, sizib chiqqan maʼlumotlar bazasidagi bitta qator turli xil shaxsiy maʼlumotlarni oʻz ichiga olishi mumkin. Xususan, gap ism, elektron pochta manzili, pasport maʼlumotlari yoki servisdagi login va parol haqida ketishi mumkin.
Markaziy Osiyoda xavf ostida qolgan maʼlumotlarning tarmoqlar boʻyicha hajmida davlat sektori ustunlik qildi, uning hissasiga barcha yozuvlarning 96 foizi toʻgʻri keldi. Bunga Tojikistondagi 217 mln.dan ortiq qatorga taʼsir qilgan bitta yirik sizib chiqish asosiy sabab boʻldi.
Taʼlim sohasi xavf ostida qolgan yozuvlarning 3 foizi bilan ikkinchi oʻrinni egalladi. Asosiy hajm Qozogʻiston taʼlim platformalaridan sizib chiqishlarga toʻgʻri keldi — qariyb 8,5 mln yozuv.
Sizib chiqish nashrlari soni boʻyicha taqsimot boshqacha boʻldi. Barcha nashrlarning 43 foizi davlat sektoriga, 29 foizi taʼlimga, 28 foizi esa moliya sektoriga toʻgʻri keldi. Xavf ostida qolgan maʼlumotlar hajmi nisbatan kichik boʻlishiga qaramay, ushbu sektorlarning har biri bir nechta alohida sizib chiqishlar manbaiga aylandi.
«Markaziy Osiyo bitta yirik sizib chiqish butun bir mintaqa statistikasini qanday oʻzgartirishi va millionlab yozuvlarga taʼsir qilishi mumkinligini koʻrsatmoqda. Shunga qaramay, muntazam ravishda sodir boʻladigan kichik sizib chiqishlar ham biznes va fuqarolar uchun kamroq xavfli emas», — dedi F6 andergraundni tadqiq qilish va monitoring qilish boʻlimi rahbari Lada Kryukova.
Kompaniya tashkilotlar va davlat organlariga maʼlumotlar himoyasini kuchaytirishni, xavfsizlik darajasini muntazam baholashni, xavf ostida qolgan hisob maʼlumotlarini kuzatib borishni va hodisalarga chora koʻrish rejalarini joriy etishni tavsiya qiladi. F6 baholashiga koʻra, bunday choralar keng koʻlamli maʼlumotlar sizib chiqishi oqibatlarini kamaytirish imkonini beradi.