Oʻzbekiston hokimliklari majburiy mehnatga yoʻl qoʻyib boʻlmasligi haqida ogohlantirildi
Davlat mehnat inspektsiyasi hokimliklarni xodimlarni ish vaqtidan tashqari, dam olish va bayram kunlarida ishlashga majburlash yoʻl qoʻyib boʻlmaydigan holat ekanligi haqida ogohlantirdi.
Oʻzbekiston hokimliklari majburiy mehnatga yoʻl qoʻyilmasligi haqida ogohlantirildi
Davlat mehnat inspektsiyasi Qoraqalpogʻiston Respublikasi Vazirlar Kengashi, viloyatlar, Toshkent shahri, shuningdek, tuman va shaharlar hokimliklariga majburiy mehnatga yoʻl qoʻyilmasligi toʻgʻrisida rasmiy ogohlantirish xatlari yubordi.
Idorada taʼkidlanishicha, xodimlarni ularning roziligisiz, tahdid yoki bosim ostida belgilangan ish vaqtidan tashqari ishlarga, shuningdek, dam olish va bayram kunlarida ishga jalb qilish mumkin emas.
Ushbu ogohlantirish mehnat qonunchiligi buzilishining oldini olish va xodimlarning huquqlarini himoya qilishga qaratilgan.
Davlat mehnat inspektsiyasi maʼlumotlariga koʻra, joriy yilning sakkiz oyi davomida hokimliklarning uch nafar mansabdor shaxsi majburiy mehnatga yoʻl qoʻyganligi sababli maʼmuriy javobgarlikka tortilgan.
Inspektsiya majburiy mehnat bilan bogʻliq aniqlangan barcha qonunbuzarliklar qonunchilikda belgilangan tartibda koʻrib chiqilishini maʼlum qildi. Aybdor deb topilgan shaxslarga nisbatan qatʼiy choralar koʻriladi.
Majburiy mehnatga duch kelgan yoki bunday holatlar haqida maʼlumotga ega boʻlgan fuqarolarga Davlat mehnat inspektsiyasiga murojaat qilish tavsiya etiladi.
Bunday faktlar haqida @munosibmehnat_bot Telegram-boti, +998 71 200-06-00 ishonch telefoni yoki 1176 qisqa raqami orqali xabar berish mumkin.