Oʻzbekiston Global innovatsion indeksda ikki pogʻonaga koʻtarildi

Oʻzbekiston Global innovatsion indeksda ikki pogʻonaga koʻtarildi

Oʻzbekiston 2026 yilgi Global innovatsion indeksda (GII) 77-oʻrinni egallab, oʻtgan yilga nisbatan oʻz natijasini ikki pogʻonaga yaxshiladi. Butunjahon intellektual mulk tashkiloti (WIPO) reytingida 139 ta mamlakat taqdim etilgan.

Bir yil avval Oʻzbekiston 79-oʻrinda edi. 2026 yilda mamlakat innovatsiyalar samaradorligi koʻrsatkichlari boʻyicha ham oʻz mavqeini yaxshiladi — 92-oʻrindan 78-oʻringa koʻtarildi. Innovatsiyalarga yoʻnaltiriladigan resurslar va investitsiyalar hajmi boʻyicha Oʻzbekiston bir yil avvalgi 69-oʻringa nisbatan 68-oʻrinni egalladi.

Daromadi oʻrtachadan past boʻlgan mamlakatlar reytingida Oʻzbekiston 36 ta davlat ichida sakkizinchi, Markaziy va Janubiy Osiyo davlatlari orasida esa 11 ta davlat ichida toʻrtinchi oʻrinni egalladi.

Oʻzbekiston fan, tadbirkorlik va mehnat unumdorligi bilan bogʻliq ayrim koʻrsatkichlar boʻyicha eng yuqori oʻrinlarni qoʻlga kiritdi. Xususan, mamlakat fan va muhandislik sohasidagi bitiruvchilar soni boʻyicha dunyoda ikkinchi, tadbirkorlik siyosati va madaniyati koʻrsatkichi boʻyicha uchinchi, startaplar va kengayib borayotgan kompaniyalarni moliyalashtirish boʻyicha toʻrtinchi hamda mehnat unumdorligining oʻsishi boʻyicha yettinchi oʻrinni egalladi.

Shu bilan birga, 2030 yilgacha dunyoning 60 ta yetakchi innovatsion mamlakatlari qatoriga kirish maqsadi eʼlon qilingan.

Avvalroq Oʻzbekiston tabiiy-ilmiy savodxonlik boʻyicha PISA-2025 reytingida 32 pogʻonaga koʻtarilib, 91 ta mamlakat va taʼlim tizimi orasida 48-oʻrinni egallagan edi.