Oʻzbekiston Butunjahon koʻchmanchilar oʻyinlarida kuchli beshlikka kirdi

Oʻzbekiston Butunjahon koʻchmanchilar oʻyinlarida kuchli beshlikka kirdi

Qirgʻizistonda boʻlib oʻtgan VI Butunjahon koʻchmanchilar oʻyinlarida Oʻzbekiston terma jamoasi 19 ta medalni qoʻlga kiritib, umumiy medallar hisobida beshinchi oʻrinni egalladi. Sportchilar hisobida toʻrtta oltin, toʻrtta kumush va 11 ta bronza medali bor.

Musobaqalar 31 avgustdan 6 sentyabrgacha boʻlib oʻtdi. Unda 113 ta davlatdan 3 mingga yaqin sportchi ishtirok etib, 43 ta sport turi boʻyicha medallar uchun kurash olib bordi.

Yakuniy jadvalda Oʻzbekiston 21 ta medalga (beshta oltin, uchta kumush va 13 ta bronza) ega boʻlgan Moʻgʻulistondan keyingi oʻrinni egalladi. Shu bilan birga, oltin medallar soni boʻyicha Oʻzbekiston jamoasi faqat toʻrtta davlatdan ortda qoldi.

Oʻyinlarda Qozogʻiston gʻalaba qozondi. Uning sportchilari 32 ta oltin, 20 ta kumush va 22 ta bronza — jami 74 ta medalni qoʻlga kiritdi. Ikkinchi oʻrinni 84 ta medal bilan Qirgʻiziston egalladi, garchi ularning faqat 30 tasi oltin boʻlsa-da. Rossiya yettita oltin bilan birga jami 36 ta medal qoʻlga kiritib, uchinchi boʻldi.

Taʼkidlash joizki, yakuniy jadvalda oʻrinlar oltin medallar soniga qarab taqsimlandi, shu sababli medallarning umumiy soni har doim ham terma jamoaning egallagan oʻrniga mos kelavermaydi.

Bundan avvalroq ushbu turnirda Afgʻoniston terma jamoasi koʻkpar musobaqalaridagi ishtirokini toʻxtatgan edi. Jamoa Oʻzbekistondan 1:4 hisobida magʻlubiyatga uchraganidan soʻng shunday qarorga keldi va buni otlar bilan bogʻliq muammolar borligi bilan izohladi.