Oʻrta Chirchiqda Labo, Lacetti va Tracker toʻqnashdi
Toshkent viloyatining Oʻrta Chirchiq tumanida Labo, Lacetti va Tracker rusumli avtomobillar ishtirokida yoʻl-transport hodisasi sodir boʻldi. Toʻqnashuvdan soʻng avtomobillarda yongʻin kelib chiqqan. Rasmiy maʼlumotga koʻra, hodisada hech kim jarohat olmagan.
Oʻrta Chirchiq tumanida Labo, Lacetti va Tracker ishtirokida YTH sodir boʻldi.
Bugun ertalab, taxminan soat 07:30 atrofida, Toshkent viloyati Oʻrta Chirchiq tumani hududidan oʻtuvchi D002 «Toshkent-Nurafshon» avtomobil yoʻlining 9-kilometrida uchta avtomobil – Labo, Lacetti va Tracker toʻqnashuvi bilan bogʻliq yoʻl-transport hodisasi yuz berdi.
Hodisa natijasida avtomobillarda yongʻin kelib chiqqan. Voqea joyiga zudlik bilan yetib kelgan oʻt oʻchirish brigadalari tomonidan yongʻin toʻliq bartaraf etildi.
Dastlabki maʼlumotlarga koʻra, ushbu YTH oqibatida hech kim jiddiy jarohat olmagan.
Ayni paytda Oʻrta Chirchiq tumani Ichki ishlar boʻlimi tomonidan mazkur holat yuzasidan surishtiruv ishlari olib borilmoqda.