Nyu-York dronlar yordamida egizak minoralarni qayta tiklab, 11 sentyabr qurbonlari xotirasini yod etdi

Nyu-Yorkda dronlar yordamida egizak minoralar qayta tiklanib, 11 sentyabr qurbonlari xotirasi yodga olindi

Nyu-Yorkda 2001 yil 11 sentyabrdagi fojiali voqealarning 25 yilligiga bagʻishlangan «Nyu-York bandargohi uzra 2977 ta olov» (2977 Lights Over New York Harbor) nomli keng koʻlamli xotira loyihasi boʻlib oʻtdi. Gudzon daryosi ustidagi osmonda Jahon savdo markazi egizak minoralarining haqiqiy hajmdagi konturlari qayta tiklandi.

Yorugʻlik installyatsiyasida 2977 ta porlovchi uchuvchisiz uchish apparatidan foydalanildi — AQSh tarixidagi eng yirik terrorchilik hujumi oqibatida halok boʻlgan har bir inson xotirasi uchun bittadan apparat ajratildi. Dronlar bandargoh akvatoriyasi uzra harakatchan yulduzlar turkumini hosil qildi, soʻngra vayron boʻlgan osmonoʻpar binolarning taniqli siluetlari koʻrinishida saf tortdi.

Yorugʻlik aktsiyasi omon qolganlar, qurbonlarning oilalari va qutqaruvchilar bilan hamkorlikda tashkil etildi.

Manxettendagi rasmiy xotira marosimida Oq uy vakili sifatida AQSh vitse-prezidenti Jey Di Vens ishtirok etadi. Donald Tramp esa ushbu sanani Pentagonda yodga oladi: Nyu-Yorkdagi memorial tashkilotchilari xotira tadbirlari davomida siyosiy nutq soʻzlash qatʼiyan taqiqlanganini roʻkach qilib, uning chiqish qilish haqidagi soʻrovini rad etishdi.

2001 yil 11 sentyabrda 19 nafar terrorchi toʻrtta yoʻlovchi samolyotini egallab olgan edi. Ulardan ikkitasi Nyu-Yorkdagi Jahon savdo markazi minoralariga borib urilgan, uchinchisi Vashingtondagi Pentagon binosi ustiga qulagan, toʻrtinchisi esa ekipaj va yoʻlovchilarning qarshilik koʻrsatishidan keyin Pensilvaniya shtatidagi dalaga qulab tushgan.