Nukusda ham AQSh ko‘magida Jamoat salomatligi sohasidagi favqulodda vaziyatlar operatsion markazi ochildi
Nukusda epidemik xavflarni erta aniqlash va bartaraf etishga qaratilgan Jamoat salomatligi sohasidagi favqulodda vaziyatlar operatsion markazi ish boshladi. Aprelda Termizda ham ochilgan bunday markazlar AQSh va YUNISEF ko‘magida tashkil etilmoqda.
Nukusda ham AQSh ko‘magida Jamoat salomatligi sohasidagi favqulodda vaziyatlar operatsion markazi ishga tushirildi
4-noyabr kuni Qoraqalpog‘istonning Nukus shahrida Jamoat salomatligi sohasidagi favqulodda vaziyatlar operatsion markazining ochilish marosimi o‘tkazildi.
Ta’kidlanishicha, ushbu tadbir mamlakatning shimoli-g‘arbiy qismi va undan tashqarida yuqumli kasalliklar tarqalishi hamda jamoat salomatligi sohasidagi boshqa favqulodda holatlarga tayyorgarlik ko‘rish va ularga javob berish imkoniyatini mustahkamlash yo‘lidagi muhim qadamdir.
Yangi markaz sog‘liqni saqlash organlariga paydo bo‘layotgan tahdidlar haqidagi dastlabki ma’lumotlarni muvofiqlashtirilgan amaliy harakatlarga aylantirishda yordam beradi.
Uning operatsion vazifalari qatoriga hodisalarni boshqarish, favqulodda vaziyatlarda javob choralarini ishga tushirish tartib-taomillari, vaziyatni monitoring qilish hamda jamoat salomatligi sohasidagi favqulodda vaziyatlarga tayyorgarlik va javob choralariga mas’ul tashkilotlar o‘rtasida axborot almashish kiradi.
Markaz O‘zbekiston Sanitariya-epidemiologik osoyishtalik va jamoat salomatligi qo‘mitasi tomonidan AQSh hukumati moliyaviy ko‘magi va YUNISEFning texnik yordami bilan Global sog‘liqni saqlash xavfsizligi dasturi doirasida tashkil etildi.
Hezer Byorns sog‘liqni saqlash xavfsizligini kuchaytirishda xalqaro hamkorlikning ahamiyatini alohida qayd etdi.
“Favqulodda vaziyatlarga puxta tayyorgarlik nafaqat O‘zbekiston, balki Qo‘shma Shtatlar uchun ham muhimdir. Epidemiyalar davlat chegaralarini tan olmaydi. Shu bois global sog‘liqni saqlash sohasidagi hamkorlik barchamizni himoya qiladi”, — dedi u.
2026-yil aprel oyida Termiz shahrida ham Jamoat salomatligi sohasidagi favqulodda vaziyatlar operatsion markazi ochilgandi.
“Ushbu ikki hududiy markaz mamlakat bo‘ylab jamoat salomatligi sohasidagi favqulodda vaziyatlarni boshqarish uchun o‘zaro bog‘langan tizimni shakllantirish yo‘lida erishilayotgan taraqqiyotni ko‘rsatadi”, — deyiladi vakolatxona xabarida.
O‘zbekistonning 14 ta ma’muriy hududida bunday markazlarning yagona milliy tarmog‘ini yaratish bo‘yicha uzoq muddatli istiqbol haqida gapirdi.
“Bunday tizimning uzoq muddatli samaradorligi faqat bino va jihozlarga bog‘liq emas. Samarali tayyorgarlik uchun mahalliy hamjamiyatlarni jalb etish, ishonchli axborot, xavf-xatarlar haqida xabardor qilish va yolg‘on axborotga qarshi kurashish imkoniyatlari ham muhim. Bu choralar oilalarga xavf-xatarlarni tushunish, himoya choralarini ko‘rish va inqiroz paytida jamoat salomatligi tizimining javob choralariga bo‘lgan ishonchni saqlab qolishda yordam beradi”, — deb ta’kidladi u.
Botirjon Qurbonov esa institutsional tayyorgarlik va muvofiqlashtirishni kuchaytirish bo‘yicha hukumatdagi ustuvor yo‘nalishlarni sanab o‘tdi.
“Ustuvor vazifamiz — milliy va hududiy muassasalarni nafaqat zarur infratuzilma, balki jamoat salomatligiga tahdidlarni erta aniqlash, samarali muvofiqlashtirish va aholi salomatligini muhofaza qilish uchun o‘z vaqtida choralar ko‘rish salohiyati bilan ham ta’minlashdir”, — dedi u.