Nijnekamskda dronlar hujumi paytida jabrlangan oʻzbekistonlik vataniga olib kelindi
10 avgust kuni Rossiyaning Nijnekamsk shahriga uchuvchisiz uchish apparatlari hujumi paytida ogʻir yaralangan Oʻzbekiston fuqarosi vataniga olib kelindi. Parvoz vaqtida unga shifokorlar hamrohlik qildi, bemorga doimiy kislorod koʻmagi taʼminlandi.
Nijnekamskda dronlar hujumi oqibatida jarohatlangan oʻzbekistonlik vataniga qaytarildi
Rossiyaning Tatariston respublikasi Nijnekamsk shahriga 10 avgust kuni uyushtirilgan dronlar hujumida ogʻir jarohat olgan Andijon viloyatilik fuqaro 13 sentyabr kuni Oʻzbekistonga olib kelindi. Bu haqda «Gazeta»ga Migratsiya agentligi Toshkent viloyati filiali rahbari Yusup Kabuljanov maʼlum qildi.
Bemorni tashish boʻyicha qaror uning ahvoli barqarorlashgani va rossiyalik shifokorlar evakuatsiya qilishga ruxsat berganidan keyin qabul qilindi.
Migratsiya agentligi, Oʻzbekistonning diplomatik vakolatxonalari va Uzbekistan Airways bemorni shifoxonadan samolyotgacha tashishni tashkil etdi. U butun yoʻl davomida kislorod apparatiga ulangan holda boʻldi, parvoz vaqtida esa tibbiyot brigadasi hamrohlik qildi.
Oʻzbekistonga yetib kelgach, bemor keyingi davolanish va reabilitatsiya uchun ixtisoslashtirilgan tibbiyot muassasasiga yuborildi.
Eslatib oʻtamiz, Nijnekamskka dronlar hujumi oqibatida qurilish kompaniyasida ishlayotgan sakkiz nafar Oʻzbekiston fuqarosi halok boʻlgan edi. Ularning jasadlari 12 avgust kuni Mudofaa vazirligi samolyotida vataniga olib kelingandi.
Yana bir necha oʻzbekistonlik jarohatlangan. Jabrlanganlarga tibbiy va ijtimoiy yordam koʻrsatish, shuningdek, halok boʻlganlar va yaralanganlarning oilalarini har tomonlama qoʻllab-quvvatlash topshirilgan hukumat komissiyasi tuzilgan edi.