«Navoiyuran» va Marubeni uran qazib olishni raqamlashtirishni muhokama qildi
Oʻzbekiston kompaniyasi va Yaponiyaning Marubeni kompaniyasi uran qazib olish va qayta ishlash samaradorligini oshirish uchun sunʼiy intellekt va raqamli yechimlarni qoʻllash masalasini koʻrib chiqdilar.
«Navoiyuran» va Marubeni uran qazib olishni raqamlashtirishni muhokama qildi
«Navoiyuran» davlat korxonasi va Yaponiyaning Marubeni Corporation kompaniyasi uran qazib olish jarayonlariga raqamli texnologiyalar hamda sunʼiy intellektga asoslangan yechimlarni joriy etish imkoniyatlarini koʻrib chiqdi. Kompaniyalar vakillarining onlayn ishchi uchrashuvi 2026 yil 2 noyabr kuni boʻlib oʻtdi. Bu haqda «Navoiyuran» DK matbuot xizmati xabar beradi.
Muzokaralarda Marubeni kompaniyasining raqamli va texnologik yechimlarni ishlab chiqishga ixtisoslashgan shoʻʼba korxonasi — Dolbix Consulting ham ishtirok etdi.
Tomonlar zamonaviy texnologiyalardan foydalanish hisobiga ishlab chiqarish samaradorligini oshirish imkoniyatlariga eʼtibor qaratdilar. Xususan, gap ishlab chiqarish jarayonlarini maqbullashtirish, texnologik uskunalardan foydalanishni takomillashtirish, quduqlarni raqamlashtirish va mahsuldor eritmalarni qayta ishlashni avtomatlashtirish haqida bordi.
Uchrashuv ishtirokchilari, shuningdek, sanoat mahsulotlarini chiqarishda ilgʻor texnologik yechimlarni qoʻllash istiqbollarini muhokama qildilar.
Muzokaralar yakunida tomonlar hamkorlikning salohiyatli yoʻnalishlarini belgilab oldilar va birgalikdagi ishlarni davom ettirishga kelishib oldilar.
Muhokama «Navoiyuran»ning ishlab chiqarish jarayonlarini takomillashtirish uchun texnologik yechimlarni izlash doirasida boʻlib oʻtdi. Shu bilan birga, korxona xabarida aniq loyihalar, ularni amalga oshirish muddatlari va mumkin boʻlgan investitsiyalar hajmiga aniqlik kiritilmagan.