Navoiy viloyatida do‘lana tergan ikki fuqaro jarimaga tortildi
Xatirchi tumanida yovvoyi do‘lana tergan ikki fuqaroga jami 7,48 mln so‘m jarima solindi. Ular tabiatga yetkazilgan zararni ham qoplaydi.
Navoiy viloyatida do‘lana tergan ikki fuqaro jarimaga tortildi
Navoiy viloyatining Xatirchi tumanida yovvoyi holda o‘sadigan do‘lana mevalarini tergan ikki nafar mahalliy aholi vakiliga jarima qo‘llandi. Maʼmuriy jarimalarning jami miqdori 7,48 mln so‘mni tashkil etdi. Bundan tashqari, huquqbuzarlar tabiatga yetkazilgan 1 mln so‘mlik zararni ham qoplashi lozim. Bu haqda Navoiy viloyati ekologiya inspektorlari maʼlum qildi.
Fuqarolarga nisbatan O‘zbekiston Maʼmuriy javobgarlik to‘g‘risidagi kodeksining 79-1-moddasi asosida bayonnomalar tuzildi. Mazkur modda yovvoyi holda o‘suvchi o‘simlik xomashyosini, jumladan, oziq-ovqat va dorivor maqsadlarda ishlatiladigan o‘simliklarni yig‘ishning belgilangan tartibi va shartlarini buzganlik uchun javobgarlikni nazarda tutadi.
Huquqbuzarlardan biriga bazaviy hisoblash miqdorining (BHM) 10 baravari, ikkinchisiga esa 7 baravari miqdorida jarima belgilandi. Keltirilgan maʼlumotlarga ko‘ra, ushbu moddada fuqarolar uchun 7 baravardan 10 baravargacha, mansabdor shaxslar uchun esa 15 baravardan 25 baravargacha jarima ko‘zda tutilgan.
Yovvoyi holda o‘suvchi o‘simliklarni yig‘ish tartibi 2026 yil 15 maydagi 245-son Vazirlar Mahkamasi qarori bilan tartibga solinadi.
Hujjatda o‘simliklarni shaxsiy ehtiyojlar uchun yig‘ish hamda ularni tijorat maqsadida tayyorlash bo‘yicha turli shartlar belgilangan.
Shaxsiy foydalanish uchun yig‘ilishi mumkin bo‘lgan o‘simliklar hajmi xalq deputatlari mahalliy Kengashlari tomonidan belgilanadi.
Yovvoyi o‘simliklarni tijorat maqsadida tayyorlash uchun E-auksion platformasida onlayn-auksion orqali ularni yig‘ish huquqini olish kerak. Bunday huquqlar har yili belgilab boriladigan kvotalar doirasida beriladi. Yutilgan lot uchun to‘lov amalga oshirilgach, tizim bir ish kuni ichida elektron ruxsatnoma berishi shart.
Eʼlon qilingan materiallarda misol sifatida do‘lana mevasi va gullarini yig‘ish uchun boshlang‘ich stavka ham keltirilgan. U quritilgan vazn hisobida bir kilogramm uchun BHMning 0,005 baravarini tashkil etadi. Auksion ishtirokchilari boshlang‘ich narxni oshirishlari mumkin.
Shuningdek, boshqa yovvoyi o‘simliklarni yig‘ish uchun belgilangan boshlang‘ich stavkalar ham ko‘rsatilgan: zira uchun bir kilogrammga BHMning 0,035 baravari, rodiola uchun 0,022 baravari, moychechak gulto‘plamlari uchun 0,015 baravari, zirk mevalari uchun 0,008 baravari, naʼmatak uchun 0,005 baravari va isiriq uchun 0,004 baravari.
Yovvoyi holda o‘suvchi o‘simliklarni yig‘ishning belgilangan qoidalarini buzish maʼmuriy jarimaga tortilish hamda tabiatga yetkazilgan zararni qoplash majburiyatini keltirib chiqarishi mumkin.