Namangan viloyatida Ukrainadagi urushda qatnashgan shaxs sudlandi

Namangan viloyatida Ukrainadagi urushda qatnashgan oʻzbekistonlikka nisbatan hukm chiqarildi

Namangan viloyati Pop tumani jinoyat ishlari boʻyicha sudi 12 avgust kuni 25 yoshli Oʻzbekiston fuqarosi F.A.ga Rossiya tomonida Ukrainadagi jangovar harakatlarda qatnashgani uchun ikki yil muddatga ozodlikdan mahrum qilish jazosini tayinladi.

Sud uni Oʻzbekiston Jinoyat kodeksining 154-moddasi 1-qismi (yollanmalik) boʻyicha aybdor deb topdi. Erkak jazoni oddiy tartibli koloniyada oʻtaydi.

Ish materiallaridan maʼlum boʻlishicha, 2021 yil noyabr oyida F.A. Oʻzbekistondan Rossiyaga ishlash uchun ketgan. 2023 yil oktyabr oyida Penza sudi uni giyohvandlik vositalarini noqonuniy saqlagani uchun 8 yil-u 6 oy muddatga ozodlikdan mahrum qilgan.

Jazoni oʻtash davrida unga Rossiya Mudofaa vazirligi bilan shartnoma imzolash va Ukrainadagi jangovar harakatlarda qatnashish taklif qilingan. F.A. rozi boʻlgan va 2025 yil iyul oyi oxirida shartnoma tuzgan.

U Kaliningraddagi harbiy qismga granatomyotchi sifatida tayinlangan. Tayyorgarlikdan soʻng harbiy xizmatchi Ukrainaning Xarkov viloyati Malinovka tumaniga yuborilgan.

Ish hujjatlariga koʻra, 2025 yil 2 sentyabr kuni F.A. yetti nafar harbiy xizmatchi bilan birga jangovar harakatlar hududiga yoʻl olgan.

Yoʻlda ular boʻlgan avtomobilga uchuvchisiz uchish apparati (dron) hujum qilgan. Natijada erkak qornining chap tomoni va oʻng sonidan jarohat olgan.

F.A. sudda portlashdan keyin hushini yoʻqotganini maʼlum qildi. U Dondagi Rostovdagi gospitalda hushiga kelgan. Operatsiya vaqtida uning qornidan parcha olib tashlangan, biroq son sohasidagi parchani olib tashlashmagan.

Jangovar harakatlarda qatnashgani uchun, ish materiallariga koʻra, uning bank kartasiga 400 ming rubl oʻtkazib berilgan.

Davolanishdan soʻng F.A. 2025 yil sentyabr oyi oxirigacha gospitalda boʻlgan, keyin esa Kaliningraddagi harbiy qismga oʻtkazilgan. U yerda 2026 yil fevraligacha qolgan. Harbiy xizmatchi xizmatga yaroqsiz deb topilgani sababli, u boshqa jangovar harakatlar hududiga yuborilmagan.

Sudda F.A. avvalboshdan urushda qatnashishni istamaganini bildirdi. Uning soʻzlariga koʻra, koloniyadagi mahbuslarga Rossiya harbiy xizmatchilari pul toʻlovlari va Rossiya fuqaroligini vaʼda qilib, jangovar harakatlar hududiga borishni taklif qilishgan.

F.A.ning taʼkidlashicha, urushda qatnashishdan bosh tortgan mahbuslar, jumladan oʻzbek, tojik va qirgʻiz millatiga mansub fuqarolar koloniya xodimlari tomonidan bosimga uchragan. Uning soʻzlariga koʻra, ularning ayrimlari qiynoqqa solingan va bir kishilik kameralarga joylashtirilgan.

Shuningdek, sudlanuvchining aytishicha, koloniya xodimlari mahbuslarga qamoqda umrbod qolib ketishlari mumkinligi va hech qanday yordam ololmasliklarini aytishgan. F.A. bosimga chidolmay, yakunda shartnoma imzolashga rozi boʻlganini bildirdi.

Shu bilan birga, u haqiqatda toʻlangan mablagʻ vaʼda qilinganidan kam boʻlganini qayd etdi. Uning soʻzlariga koʻra, shartnoma shartlarida 1,9 mln rubl miqdorida bir martalik toʻlov va har oy 210 ming rubl miqdorida pul taʼminoti koʻzda tutilgan edi. Xizmat joyiga olib kelinganidan soʻng unga harbiy kiyim-bosh, Kalashnikov avtomati va ichiga 400 ming rubl tushgan bank kartasi berilgan.

2025 yil sentyabr oyidan boshlab erkak harbiy tayyorgarlikdan oʻtgan, jumladan, jangovar qurollardan foydalanish va dronlar hujumidan himoyalanishni oʻrgangan. U dengiz piyodalari tarkibida granatomyotchi boʻlib xizmat qilgan.

2025 yil sentyabr oyida F.A. Rossiya fuqaroligini olgan.

2026 yil fevral oyida F.A. xizmat paytida tanishgan serjant unga yana jangovar harakatlar hududiga yuborilishi mumkinligini aytgan.

8 fevral kuni erkak Kaliningraddagi harbiy qismni tark etib, aeroportga yoʻl olgan. Rossiya pasportidan foydalanib, Moskvaga chipta sotib olgan va shundan soʻng Oʻzbekiston elchixonasiga murojaat qilgan.

Diplomatik vakolatxonada F.A. pasportini yoʻqotgani haqida ariza yozgan. 16 fevral kuni unga «Vatanga qaytish guvohnomasi» berilgan. Shundan soʻng, uning soʻzlariga koʻra, u Rossiya pasportini yirtib, tashlab yuborgan.

17 fevral kuni F.A. Moskvaning Vnukovo aeroportidan Toshkentga uchib kelgan.

Sud majlisida erkak aybiga toʻliq iqror boʻlib, pushaymonligini bildirdi. U, shuningdek, jangovar harakatlarda qatnashish u uchun majburiy qadam boʻlganini taʼkidlab, suddan jazo tayinlashda buni hisobga olishni soʻradi.

Sud aybga iqrorlik, pushaymonlik va sudlanuvchining oilaviy sharoitini yengillashtiruvchi holatlar deb topdi. Ogʻirlashtiruvchi holatlar aniqlanmadi.

Yakunda F.A.ga jazoni oddiy tartibli koloniyada oʻtash sharti bilan ikki yil muddatga ozodlikdan mahrum qilish jazosi tayinlandi.