Namangan viloyati xizmatlar hajmini 15 foizga oshirdi
2026 yilning yanvar–sentyabr oylarida Namangan viloyatida bozor xizmatlari hajmi 49,6 trln. soʻmga yetdi, sohani rivojlantirishga 232,7 mlrd. soʻm ajratildi.
Namangan viloyati xizmat koʻrsatish hajmini 15 foizga oshirdi
2026 yilning yanvar–sentyabr oylarida Namangan viloyatida bozor xizmatlari hajmi 49,6 trln soʻmga yetdi, bu oʻtgan yilning shu davridagi koʻrsatkichdan 15 foizga koʻpdir.
Hududda xizmat koʻrsatish sohasini rivojlantirish uchun respublika byudjetidan 232,7 mlrd soʻm yoʻnaltirildi. Bu haqda Oʻzbekiston Respublikasi Iqtisodiyot va moliya vazirligi xabar beradi.
Amalga oshirilgan loyihalar hisobiga viloyatda 385 dan ortiq yangi tadbirkorlik subʼyekti tashkil etildi, yana 295 dan ortiq faoliyat koʻrsatayotgan korxona oʻz faoliyatini kengaytirdi. Yangi ish oʻrinlari soni 1950 tadan oshdi.
Dastur doirasida hududda uchta sohilboʻyi zonasi, oʻnta gavjum koʻcha, oltita yoʻlboʻyi hududi, beshta istirohat bogʻi, shuningdek, yettita turistik va boshqa loyihalar foydalanishga topshirildi.
Namangan shahridagi 24/7 rejimida ishlaydigan koʻcha asosiy obʼyektlardan biriga aylandi. Obihayot mahallasidan oʻtuvchi Lutfiy, U. Nosir va Bank koʻchalarining 2 km uzunlikdagi qismi zamonaviy savdo va xizmat koʻrsatish zonasiga aylantirildi. Loyiha uchun respublika byudjetidan 4,9 mlrd soʻm ajratildi.
Ushbu hududda umumiy uzunligi 8 km boʻlgan 20 ming kv. m piyodalar yoʻlagi rekonstruktsiya qilindi, 50 ta oʻrindiq oʻrnatildi, 3 km sugʻorish tizimi yotqizildi va 5 km lotok oʻrnatildi. Bogʻ hududidagi koʻl zamonaviy qiyofaga keltirildi.
Koʻchani yoritish va elektr energiyasi bilan taʼminlash uchun 400 ta yoritkich oʻrnatildi, 3 km elektr tarmoqlari yotqizildi va quvvati 400 kVA boʻlgan ikkita transformator punkti oʻrnatildi. Bundan tashqari, chiqindilarni yigʻish uchun yopiq maydoncha jihozlandi.
Natijada yangilangan hududda 30 ta yangi tadbirkorlik subʼyekti ochildi va 120 dan ortiq yangi ish oʻrni yaratildi.
Bu yerda savdo doʻkonlari, umumiy ovqatlanish korxonalari va maishiy xizmat koʻrsatish obʼyektlari faoliyat yuritmoqda, dam olish va sayr qilish hududlari barpo etilgan. Koʻchaga kunlik tashrif buyuruvchilar soni 2,5 ming kishidan 4,6 ming kishiga oshdi.
2026 yil oxirigacha Namangan viloyatida xizmat koʻrsatish sohasi infratuzilmasini kengaytirishni davom ettirish rejalashtirilgan. Rejada — sakkizta sohilboʻyi zonasi, 19 ta gavjum koʻcha, 12 ta yoʻlboʻyi hududi, beshta istirohat bogʻi, shuningdek, yettita turistik obʼyekt va koʻchalar bor.
Ushbu loyihalar doirasida 450 dan ortiq yangi tadbirkorlik subʼyektlarini tashkil etish va 200 dan ortiq faoliyat koʻrsatayotgan tadbirkorlar faoliyatini kengaytirish koʻzda tutilgan. Yangi ish oʻrinlari soni, rejaga koʻra, 2100 taga yaqinni tashkil etishi kerak.