Namangan viloyati Gamma Meccanica kompaniyasi bilan 105 mln dollarlik shartnoma imzoladi
Shavkatjon Abdurazzokov boshchiligidagi Namangan viloyati delegatsiyasi Italiyaning Gamma Meccanica kompaniyasi bilan muzokaralar oʻtkazdi. Tomonlar 105 million dollarlik investitsiya bitimini tuzdilar.
Namangan viloyati Italiyaning Gamma Meccanica kompaniyasi bilan 105 million dollarlik investitsiya shartnomasini imzoladi.
Hujjat viloyat hokimi Shavkatjon Abdurazzoqov boshchiligidagi delegatsiyaning Italiyaga amaliy tashrifi doirasida korxona rahbariyati bilan oʻtkazilgan muzokaralar yakuni boʻyicha imzolandi.
Safar davomida delegatsiya sanoat uskunalarini ishlab chiqarishga ixtisoslashgan Gamma Meccanica kompaniyasining ishlab chiqarish quvvatlari va texnologiyalari bilan tanishdi.
Kompaniya 1977 yilda tashkil etilgan. Uning bosh qarorgohi va asosiy ishlab chiqarish maydoni Emiliya-Romanya viloyatining Bibbiano shahrida joylashgan. Gamma Meccanica binolarni issiqlik izolyatsiyasi uchun qoʻllaniladigan mineral paxta va XPS-panellar ishlab chiqarish texnologik tarmoqlarini, shuningdek, plastik chiqindilarni qayta ishlash uskunalarini ishlab chiqaradi.
Kompaniya prezidenti Andrea Burini bilan oʻtkazilgan uchrashuvda tomonlar Namangan viloyatida sanoat ishlab chiqarishini rivojlantirish istiqbollari, energiya tejovchi texnologiyalarni joriy etish va plastik chiqindilarni qayta ishlash sohasida qoʻshma loyihalarni amalga oshirishni muhokama qildilar.
Investitsiyaviy hamkorlik masalalari va kompaniya texnologiyalarini viloyat sanoat sektorida qoʻllash imkoniyatlari alohida koʻrib chiqildi.
Muzokaralar yakuni boʻyicha tomonlar 105 million dollarlik investitsiya shartnomasini imzoladilar. Shu bilan birga, xabarda loyihani amalga oshirish muddatlari, uning ishlab chiqarish parametrlari va investitsiyalarning taqsimlanishiga aniqlik kiritilmagan.