«MU» va «Tottenhem»da dahshatli start, «Real»ni yangi futbolchisi qutqardi. Kun oʻyinlari

«MU» va «Tottenhem» mavsumni dahshatli boshladi, «Real»ni esa yangi futbolchi qutqardi. Kun oʻyinlari haqida batafsil.

**Angliya: Top klublar karaxt ahvolda**

**«Hall Siti» – «Manchester Yunayted» 2:0**

**Gollar:** Adjayi, 17 (1:0). Mendi, 38 (2:0).

**«Hall Siti» tarkibi:** Tzolakis, Adjayi (Makneyr, 64), Igan, Mendi (Herrington, 64), Jayls (Targett, 85), Koyl (Drameh, 70), Kruks, Sleyter, Strud (Millar, 71), Bellumi, Makberni.

**«Manchester Yunayted» tarkibi:** Lammens, Maguayr, Heven, Shou, Mazraviy (Dalot, 80), Santos (Maynu, 67), Tilemans (Sheshko, 67), Brunu Fernandesh, Dorgu (Reshford, 46), Mbemo, Kunya (Leysi, 80).

**Ogohlantirishlar:** Kruks, 42. Millar, 90 – Dorgu, 34.

Shanba kungi dastur sensatsion natija bilan boshlandi: toʻqqiz yillik tanaffusdan soʻng APLga qaytgan «Hall Siti» «Manchester Yunayted»ni magʻlub etdi. Ikkala gol ham standart vaziyatlardan soʻng markaziy himoyachilar tomonidan kiritildi. APLda besh yarim yil avval gol urgan Adjayi darvozabondan qaytgan toʻpni aniq zarba bilan darvozaga joyladi. Tanaffus oldidan esa jarima zarbasidan keyin toʻpga yaxshi ochilgan Mendi Lammensni ikkinchi bor oʻz darvozasidan toʻp olib chiqishga majbur qildi.

Ikkinchi boʻlimda Maykl Kerrik Reshfordni maydonga tushirdi, ammo oʻyin oxirigacha hisob oʻzgarmadi. Mehmonlar toʻpga koʻproq egalik qildi, koʻproq vaziyatlar yaratdi va zarbalar berdi, «Hall» esa bor eʼtiborini hisobdagi ustunlikni saqlab qolishga qaratib, chuqur himoyalandi. Oʻyinning soʻnggi qismida mezbonlar darvozaboni Tzolakisning seyvlari hal qiluvchi ahamiyatga ega boʻldi. U Mbeumoning murakkab zarbasini qaytardi va oʻyinga intriga qaytishiga yoʻl qoʻymadi. Yakunda «yoʻlbarslar» oʻz tarixida ilk bor «MU»ni APL oʻyinida magʻlub etishdi. Mankunianliklar esa bir narsada barqaror: ushbu jamoa APL tashkil etilganidan buyon ilk bor ketma-ket ikki mavsumda ochilish oʻyinida magʻlub boʻlmoqda.

**«Brentford» – «Tottenhem Hotspur» 3:0**

**Gollar:** Lyuis-Potter, 12 (1:0). Yanelt, 33 (2:0). Kayode, 49 (3:0).

**Aniq ijro etilmagan penalti:** Tiago, 54’.

**«Brentford» tarkibi:** Kelleher, Ayer, Kollinz, Lyuis-Potter, Kayode (Hiki, 76), Sangare (Damsgor, 76), Yanelt, Yensen (Yarmolyuk, 67), Shade, Uattara (Entoni, 67), Tiago (Uilson, 83).

**«Tottenhem Hotspur» tarkibi:** Kinski, Senesi, van Hekke, Robertson, Grey (Udodji, 86), Bergvall (Fernandesh, 46), Tonali, Gallaher (Bentankur, 46), Tel, Mur (Meddison, 68), Risharlison (Solanke, 68).

**Ogohlantirishlar:** Yanelt, 78 – Gallaher, 34.

Koʻpchilik yozdagi kuchli transfer kampaniyasi va mavsumoldi yigʻinini toʻliq jamoa boʻlib oʻtkazganidan keyin «Tottenhem» yangi mavsumda yuqori oʻrinlar uchun kurashishini taxmin qilayotgandi. Ammo oʻtgan mavsumda amallab ligada jon saqlab qolgan (17-oʻrin) «shporlar» qisqa muddatda butunlay oʻzgarishi qiyin edi. «Brentford» shanba kungi oʻyinni kuchli pozitsiyada boshladi, jamoaning yozdagi xaridlaridan biri boʻlgan Sangare esa darhol oʻzining qanchalik yaxshi futbolchi ekanini namoyish etishga kirishdi. «Lans»ning sobiq havbeki jarima maydoni yaqinida jamoadoshi bilan devor uslubida oʻynadi va toʻpni qulay nuqtada, darvozani oʻqqa tutishga shay turgan Lyuis-Potterga yetkazib berdi. Keyin esa Kinski «shporlar»ni uyaltirdi. Oʻtgan mavsum oxirida jamoa chempionshipga tushib ketmasligida muhim rollardan birini bajargan darvozabon toʻpni uzoqlashtirishda muvaffaqiyatsiz harakat qildi – uning bosim ostidagi jamoadoshi toʻpni oldirdi, tezkor qarshi hujumda yoʻllangan zarba ham unchalik xavfli chiqmagandi, ammo darvozabon toʻpni maydon tashqarisiga chiqarib yuborish oʻrniga, raqibning oyogʻi ostiga tashlab berdi – 0:2.

«Asalarilar» ikkinchi boʻlim boshida uchinchi golni ham darvozabondan qaytgan toʻpni darvozaga kiritib yuborish orqali urishdi. Biroz oʻtib hisob yanada yiriklashishi mumkin edi, ammo Igor Tiago 11 metrdan aniq zarba yoʻllay olmadi – u darvozabonni alday oldi, ammo toʻp ustunga bordi. Yakunda «Brentford» shu hisobni ushlab qoldi va APLda «Tottenhem»ga qarshi uy oʻyinlaridagi ilk gʻalabasini nishonladi. Londonliklar uchun esa bu 2024/25 yillar mavsumi startidan buyon safar oʻyinlaridagi 40-magʻlubiyat boʻldi. Bu borada bundan yomonroq natijani oʻtgan mavsum oxirida chempionshipga tushib ketgan «Vulverhempton» qayd etgan (44). «Tottenhem»da inqiroz davom etmoqda.

**Ispaniya: «Real»da yangi qahramon**

**«Espanyol» – «Real» 1:2**

**Gollar:** Bellinghem, 9 (0:1). Kalatrava, 30 (1:1). Espi, 90 (1:2).

**«Espanyol» tarkibi:** Dmitrovich, Ridel (Drkushich, 66), Nunes, Inoxo, Al-Hiloliy, Gonsales de Sarate (Pol Losano, 75), Eksposito (J. Karreras, 88), Dolan, Kalatrava (Bausa, 66), Fernandes, Ernandes (Pere Milya, 75).

**«Real» tarkibi:** Kurtua, Hausen, Konate, A. Karreras (Kukurelya, 64), Dyumfris (Aleksandr-Arnold, 80), Valverde, Bernardu Silva (Kamavinga, 80), Bellinghem (Espi, 80), Vinisius Junior, Arda Guler (Diomande, 64), Mbappe.

**Ogohlantirishlar:** Kalatrava, 32. Ridel, 59. Eksposito, 84. Pere Milya, 90. Pol Losano, 90 – Vinisius Junior, 32.

Birinchi turda dam olgan madridliklar La Liganing 2-turi doirasida Kataloniyaga safar qilishdi. Jamoaning koʻpchilik vakillari jahon chempionatidan kech qaytishgani tufayli 1-tur doirasidagi oʻyin boshqa vaqtga surib berilgandi. «Espanyol»ga qarshi oʻyin oʻta asabiy kechdi va barchasi soʻnggi daqiqalarda hal boʻldi.

Madridliklar boshqaruviga qaytgan Joze Mourinio boshlangʻich tarkibda oʻng qanot himoyasiga Trent Aleksandr-Arnoldni emas, yozda olib kelingan yangi futbolchilardan biri Denzel Dyumfrisni tushirdi. Oʻz navbatida, chap qanot himoyasi uchun olib kelingan Kukurelya zaxirada qoldirildi va Karrerasga ishonch bildirildi. Shuningdek, yozda kelgan yangi futbolchilardan Konate va Bernardu Silva boshlangʻich tarkibga kirdi, Diomande zaxirada qoldi.

Oʻyindagi birinchi golni uzoq kutish talab etilmadi: toʻqqizinchi daqiqada Vinisius chap qanotga yaqin hududda jarima zarbasi ishladi, Guler jarima maydoniga kirib borgan Bellinghemni golli pas bilan taʼminladi. Koʻp oʻtmay Arda ikkinchi golli pas muallifiga aylanishi mumkin edi, ammo darvozabon bilan yakkama-yakka vaziyatga chiqib borayotgan Mbappening oyogʻidan toʻpni raqib himoyachisi olib qoʻydi.

Boʻlim oʻrtalaridan oʻtganda madridliklar tashabbusni raqibga berishdi va buning uchun jazolanishdi. Mezbonlar bir necha daqiqa davomida toʻpga egalik qilib turishdi va 30-daqiqada oddiy kombinatsiya orqali hisobni tenglashtirishdi: Xavi Ernandes Aleks Kalatravani qulay pozitsiyaga chiqarib yubordi, u esa imkoniyatdan foydalandi. Birinchi boʻlim oxirlarida esa Roberto Fernandes «Real»ni ayadi va bir necha metr masofadan turib toʻgʻri zarba bera olmadi.

64-daqiqada Mourinio Karreras va Gulerni zaxiraga olib, Kukurelya va Diomandening debyut qilishiga imkon berdi. Yan Diomande qolgan vaqt davomida raqib himoyachilarini tahlikada ushlab turdi va aynan uning faolligidan keyin Valverdeda qulay vaziyat yuzaga keldi. Ammo urugvaylik yarimhimoyachining zarbasidan keyin toʻp ustunga bordi.

80-daqiqada Kamavinga, Trent va klubning yangi hujumchisi Karlos Espi ham oʻyinga qoʻshildi. Mourinioning rejasi tushunarli edi: «avtobus» qoʻyib olgan raqib himoyasini ketma-ket hujumlar bilan bostirish. Va yakunda bu reja ish berdi. Oʻyinga qoʻshib berilgan daqiqalarda Karlos Espi Mbappe uyushtirgan hujumda toʻpga birinchi boʻlib yetib bordi va madridliklar safidagi ilk oʻyinidayoq gʻalaba golini urishga muvaffaq boʻldi. Oʻtgan mavsumda jamoaga aynan u kabi joker yetishmagandi.

Shu bilan birga, oʻyin davomida «Real»dagi eski muammo tez-tez boʻy koʻrsatib turdi: hamon Vinisius va Mbappe bir-biriga xalal bermoqda, bir-birini yaxshi his qilmayapti va shu tufayli hujumlar oxirigacha yetmay qolmoqda. Bu safar Mourinioni tarkib kengligi qutqarib qoldi.

**«Atletik» – «Sevilya» 1:3**

**Gollar:** Oso, 15 (0:1). Edjuke, 50 (0:2). Romero, 57 (0:3). Paredes, 70 (1:3).

**«Atletik» tarkibi:** Simon, Paredes (Rinkon, 74), Alvares, Berchiche, Areso (Lyaport, 58), Gerenabarrena (Ruis de Galarreta, 83), Kanales, Sanset, Berenger, Inyaki Uilyams (Uilyams, 58), Guruseta (Sannadi, 58).

**«Sevilya» tarkibi:** Vlahodimos, Kastrin, Sangante (Karmona, 68), Suaso, Iglesias, Agume, Guridi (Guillen, 46), Peke Fernandes (Romero, 46), Oso (Dias, 78), Serra (Edjuke, 46), Ure.

**Ogohlantirishlar:** Guruseta, 25. Ruis de Galarreta, 87 - Peke Fernandes, 22. Serra, 25. Guridi, 39. Romero, 90. Guillen, 90.

**Chetlatish:** Berchiche, 11.

Edin Terzich «Atletik» bosh murabbiyi sifatidagi ilk rasmiy oʻyinida muvaffaqiyatsizlikka uchradi, ammo bunga oʻyin startidagi kutilmagan voqealar sabab boʻldi. Basklar safidagi eng tajribali futbolchilar jamoani qiyin ahvolga solib qoʻyishdi. Birinchidan, 11-daqiqadayoq Berchiche soʻnggi umid foli uchun maydondan chetlatildi. Ikkinchidan, bir necha daqiqa oʻtib Ispaniya milliy jamoasi bilan jahon chempioni boʻlgan va oʻz darvozasini uzoq vaqt daxlsiz saqlash boʻyicha turnir rekordini oʻrnatgan Unai Simon raqibga gol sovgʻa qildi. U oddiy vaziyatda toʻpni raqib yarimhimoyachisi Osoning oyogʻiga tashlab berdi. «Atletik» esa oʻn kishi boʻlib qolganiga qaramay hujumda oʻynadi, ammo gol ura olmadi.

Hisobdan kelib chiqib maksimal darajada pragmatik oʻyin uslubini tanlagan «Sevilya» ikkinchi boʻlimda baribir sondagi ustunlikdan foydalandi va qisqa vaqt oraligʻida uyushtirilgan ikkita hujum bilan oʻyindagi intrigaga barham berdi. Yoʻqotadigan narsasi qolmaganidan keyin bilbaoliklar yana oldinga tashlanishdi va Paredesning goli bilan hisobni biroz qisqartirishdi. Mezbonlar koʻproq golli vaziyatlar yaratishdi, ammo andalusiyaliklar aniqroq oʻynashdi va ketma-ket ikkinchi gʻalabadan keyin turnir jadvalida peshqadamga aylanib olishdi.