Mourinyo 125 mln yevrolik futbolchini himoya qildi
**Mourinyo 125 million yevrolik futbolchini himoya qildi**
Madridning “Real” klubi bosh murabbiyi Joze Mourinyo Yan Diomandeni faqat uning transferi uchun to‘langan ulkan mablag‘ga qarab baholamaslikka chaqirdi.
Yosh futbolchi “Leypsig”dan Madridga 125 million yevro evaziga o‘tdi, shuningdek, yana 5 million yevro bonuslar ko‘rinishida to‘lanishi rejalashtirilgan. Biroq, Diomande transferdan so‘ng yangi jamoasi safida hali gol ura olmadi.
Gollarning yo‘qligiga qaramay, Mourinyo xavotirga sabab ko‘rmayotganini va yangi futbolchiga moslashish hamda o‘z salohiyatini bosqichma-bosqich namoyish etish uchun vaqt kerakligini ta’kidladi.
“U bosqichma-bosqich harakat qilishi kerak. Yan ko‘p mehnat qilmoqda va buni yaxshi bajaryapti. U ochiqko‘ngil va kamtar yigit, o‘rganishni xohlaydi, jamoadoshlarining fikrlariga quloq tutadi va kelajakda, albatta, rivojlanadi”, dedi murabbiy.
“Real” ustozi transfer narxining yuqoriligi yosh futbolchidan noto‘g‘ri kutilmalar paydo bo‘lishiga sabab bo‘lmasligi kerakligini urg‘uladi:
“Katta mablag‘ga amalga oshgan transferga qarab futbolchidan ko‘p narsa kutish mening ishim emas. Men uchun muhimi — “Leypsig” safida juda kuchli mavsum o‘tkazgan futbolchini ko‘rish”.
Mourinyoning fikricha, futbolchi uchun shunday katta mablag‘ to‘langanda, muxlislar undan avtomatik ravishda darhol natija kutishni boshlaydi. Biroq, Diomande holatida bunday yondashuv adolatsiz.
“Shunday katta summa haqida eshitganingizda, jamoaga kelishi bilanoq barchani hayratda qoldiradigan futbolchini tasavvur qilasiz. Ammo bu yerda vaziyat boshqacha. Oldimizda yosh futbolchi turibdi. Xotirjamlikni saqlash va xavotirga berilmaslik kerak”, dedi Mourinyo.
Yan Diomandening bugungi kungacha erishgan asosiy shaxsiy yutug‘i 2025/26-yilgi mavsum yakunlariga ko‘ra Bundesliganing eng yaxshi yosh futbolchisi deb topilganidir.
O‘tgan mavsumda vinger Germaniya klubi safida 36 ta uchrashuvda maydonga tushib, 13 ta gol urdi va 9 ta golli uzatmani amalga oshirdi.
Muvaffaqiyatli mavsum Diomandega faoliyatida navbatdagi qadamni tashlash imkonini berdi: 2026-yilning yozida 19 yoshli futbolchi Ispaniyaga ko‘chib o‘tib, Madridning “Real” klubi futbolchisiga aylandi.