Missisipi shtatida qora tanli oʻsmirning oʻlimi boʻyicha hech kimga jinoiy ayblov qoʻyilmaydi, deydi hakamlar hayʼati
Nolan Uellsning oilasi u «uch nafar yosh oq tanli erkak bilan qayiqda ketganidan keyin» vafot etgani haqida tashvish bildirgan edi.
Missisipilik qora tanli oʻsmirning oʻlimi boʻyicha hech kimga jinoiy ayblov qoʻyilmaydi, deydi hakamlar hayʼati
Katta hakamlar hayʼati (grand jury) 4 iyul kuni doʻstlari bilan qayiqda sayrga chiqqanidan ikki kun oʻtib oʻlik holda topilgan missisipilik oʻsmirning oʻlimi boʻyicha hech kimga nisbatan jinoiy ayblov qoʻymaydi.
Oila tomonidan yollangan fuqarolik huquqlari boʻyicha advokat Ben Kramp qora tanli Nolan Uellsning «uch nafar oq tanli yigit bilan qayiqda aylanishga chiqqanidan keyin vafot etgani» va guvohlarning koʻrsatmalari bir-biriga zid kelganidan xavotir bildirgan edi.
Jekson okrugi prokurori Enjel Mayers MakIlratning aytishicha, katta hakamlar hayʼati Uellsning oʻlimida biror kimga jinoiy ayblov qoʻyish uchun dalillar yetarli emas deb topgan.
AQSh OAVlariga bergan bayonotida Kramp katta hakamlar hayʼatining xulosasi «javoblardan koʻra koʻproq savollarni qoldirganini» aytdi.
«Nolanning oilasi unga nima boʻlganini bilmagunimizcha tinchimaydi, biz ham toʻxtamaymiz», dedi u.
Politsiya Uellsning tasodifan choʻkib ketganini aytgan boʻlsa, uning doʻstlari qayiqdagi muammo tufayli ertaroq qaytishga qaror qilishganida, u Xorn orolida qolishni afzal koʻrganini bildirishgan.
Dushanba kuni okrug prokurorining ijtimoiy tarmoqlarida eʼlon qilingan katta hakamlar hayʼati hisobotida «janob Uells jasadining holati, topilgan vaqti va joyi choʻkish holatiga mos kelishi» aniqlangan.
«Nolanning oʻlimi va gʻoyib boʻlishi irqiy sabablarga koʻra sodir boʻlgan degan daʼvolarni tasdiqlovchi hech qanday dalil yoʻq», dedi Mayers MakIlrat videomurojaatida.
Hisobotga koʻra, 25 nafar katta hakamlar hayʼati aʼzosi 43 nafar guvohning, jumladan, Uellsning oilasi tomonidan mustaqil ekspertiza oʻtkazish uchun yollangan sud-tibbiyot ekspertining koʻrsatmalarini tinglagan.
«Katta hakamlar hayʼati 2026 yil 4 iyul kuni Xorn oroliga borgan yoki u yerdan qaytgan biror bir shaxsning janob Uellsning oʻlimi bilan bogʻliq jinoiy harakatlar sodir etgani toʻgʻrisidagi ommaviy daʼvolarni tasdiqlovchi ishonchli dalil topmadi», deyiladi hisobotda.
Hisobotda aytilishicha, Uels bilan birga boʻlganlar tergov bilan toʻliq hamkorlik qilishgan va GPS qurilmalari, kuzatuv kameralari tasvirlari, uyali telefonlar va boshqa dalillarni taqdim etishgan.
Shuningdek, gavjum bayram kunlarida Xorn oroliga kelgan mehmonlarning kelgan qayiqlaridan boshqa qayiqlarda qolishi va ketishi odatiy hol ekani qayd etilgan.
Janubi-Gʻarbiy Missisipi jamoat kollejida amerikacha futbol oʻynagan va murabbiyi tomonidan «quvnoq va begʻam bola» deb taʼriflangan Uellsning onasi Kristin Uonsli birinchi boʻlib oʻgʻlining 4 iyul kuni kechqurun qaytmaganidan keyin gʻoyib boʻlgani haqida bong urgan.
Mahalliy, shtat va federal idoralar ishtirokidagi qidiruv ishlaridan soʻng, rasmiylar uning jasadini 6 iyul kuni orol qirgʻoqlari yaqinidan topishgan.