Misr qirolichasining 4,3 mln dollarlik brilliant marjoni oʻgʻirlab ketildi

**Misr qirolichasi Nazli Sabriga tegishli 4,3 million dollarlik brilliant marjon Venadagi muzeydan oʻgʻirlandi**

Avstriyaning Vena shahridagi Amaliy sanʼat muzeyidan Misrning sobiq qirolichasi Nazli Sabriga tegishli boʻlgan, 673 ta brilliant bilan bezatilgan tarixiy marjon oʻgʻirlab ketildi. Ushbu qimmatbaho taqinchoqning qiymati 4,3 million dollarga baholanmoqda.

Voqea 27-avgust kuni, taxminan soat 14:00 atrofida, muzeyning ish vaqti davomida sodir boʻlgan. Ikki nafar nomaʼlum shaxs muzeyga oddiy tashrif buyuruvchilar kabi chipta sotib olib kirishgan va yuzlarida niqob boʻlmagan.

Oʻgʻrilar fransuz zargarlik uyi «Van Cleef & Arpels» koʻrgazmasi joylashgan zalga oʻtib, bolgʻa yordamida eksponat saqlanayotgan shisha vitrinani sindirishgan. Jinoyatchilardan birida oʻqotar qurol boʻlganligi taxmin qilinmoqda, shu sababli muzey xavfsizlik xodimlari ularga qarshilik koʻrsata olishmagan. Oʻgʻrilar qimmatbaho marjonni olib, nomaʼlum tomonga qochib ketishgan. Hodisa vaqtida zalda boʻlgan boshqa tashrif buyuruvchilarga hech qanday zarar yetmagan.

Platina metalidan ishlangan marjonga umumiy ogʻirligi 200 karatdan ortiq boʻlgan 673 ta brilliant oʻrnatilgan. Bu nodir sanʼat asari 1939-yilda Misr qirolichasi Nazli uchun maxsus tayyorlangan. Qirolicha uni qizining Eron taxt vorisi, keyinchalik esa mamlakat shohi boʻlgan Muhammad Rizo Pahlaviy bilan toʻyida taqishni rejalashtirgan edi.

Keyinchalik qirolicha moliyaviy qiyinchiliklar tufayli ushbu taqinchoqni sotib yuborgan. 2015-yilda esa «Van Cleef & Arpels» zargarlik uyi uni Nyu-Yorkdagi Sotheby's auksionidan 4,3 million dollarga oʻz arxiv kolleksiyasi uchun qayta sotib olgan edi.

Hozirda Avstriya politsiyasi va Interpol oʻgʻrilarni topish boʻyicha keng koʻlamli operatsiya olib bormoqda.