MI5 rahbari Buyuk Britaniyaga Rossiya, Eron va sunʼiy intellekt tomonidan tahdidlar mavjudligidan ogohlantirdi

MI5 rahbari Buyuk Britaniyaga Rossiya, Eron va SI (sunʼiy intellekt) tomonidan tahdid solinayotganidan ogohlantirdi

Razvedka xizmati rahbarining maʼlum qilishicha, MI5 davlat tahdidlariga qarshi kurashishga Sovuq urush davridagidan koʻra koʻproq resurs ajratmoqda va Rossiyani "birinchi raqamli tajovuzkor" deb atadi.

Ser Ken Makkallum ogohlantirishicha, xorijiy raqiblar tomonidan tahdidlar toʻrt baravarga ortgani sababli, MI5 hozirda "terrorizm va davlat tahdidlari boʻyicha operativ vazifalar deyarli teng miqyosda boʻlgan" vaziyatga duch kelmoqda.

Londondagi ichki razvedka xizmati bosh qarorgohida soʻzlagan yillik maʼruzasida u Eron va "oʻng ekstremistik terrorizm" tomonidan ortib borayotgan tahdidlar haqida ham ogohlantirdi.

Ser Kenning qoʻshimcha qilishicha, MI5 "sunʼiy intellektdan foydalanishga uringan terrorchilarni tutgan", jumladan, bu texnologiyani dronlar bilan birlashtirish holatlari aniqlangan va Buyuk Britaniya zoʻravon guruhlar tomonidan yangi biologik qurollar ishlab chiqilishi xavfidan hamisha bir qadam oldinda boʻlishi kerakligini taʼkidladi.

MI5 rahbarining aytishicha, Rossiya NATOning javob qaytarishidan ehtiyotkorlik bilan qochgan holda gibrid urush olib bormoqda. Uning soʻzlariga koʻra, Kreml bu chiziqni "kesib oʻtsa, ahmoqlik qilgan boʻladi".

Ser Kenning taʼkidlashicha, Rossiya harbiy alyans bilan "oddiy nizo" chiqarishdan oʻzini tiymoqda va Ukrainaga keng koʻlamli bostirib kirishdagi ilgarilashi "minimal va dahshatli darajada qimmatga tushayotgan" bir paytda, buning oʻrniga Yevropa mamlakatlarini beqarorlashtirishga harakat qilmoqda.

Uning aytishicha, MI5'ning Buyuk Britaniyadagi rossiyalik aygʻoqchilarni aniqlash va haydab chiqarishdagi muvaffaqiyati Kremlni rejalashtirilgan hujumlar uchun yollanma shaxslarga pul toʻlashga majbur qildi.

U soʻzida davom etdi: "Bosqindan beri 1 000 ga yaqin chiqarib yuborishlar tufayli anʼanaviy yashirin ishtiroki barbod boʻlgach, Kremlning global vositalar toʻplami zaiflashib qoldi. Shuning uchun biz ularning oʻz topshiriqlarini bajarish uchun jinoyatchilarga pul toʻlashga urinayotganini koʻrmoqdamiz".

U qoʻshimcha qildi: "Bular strategik ustunlikka ega boʻlgan buyuk davlatning harakatlari emas".

Ser Ken, shuningdek, Eron Buyuk Britaniyada gibrid kampaniyani kengaytirayotganidan ogohlantirdi.

Razvedka rahbarining aytishicha, oʻtgan yili Eron bilan bogʻliq faoliyat sabab 50 kishi hibsga olingan.

Eronning bu tajovuzkorligining katta qismi yahudiy jamoalariga, shuningdek, "harbiy obʼyektlar kabi qiyinroq nishonlarga" qaratilgan, deb qoʻshimcha qildi ser Ken.

Ser Kenning taʼkidlashicha, Milliy xavfsizlik toʻgʻrisidagi qonun — xorijiy davlatlar manfaatlari yoʻlida Buyuk Britaniya manfaatlariga qarshi ishlaydigan shaxslarga qarshi qaratilgan 2023 yilgi qonun — faol qoʻllanilmoqda va undan Eron hamda Rossiya bilan bir qatorda Xitoydan kelayotgan tahdidlarga qarshi kurashishda ham foydalanilgan.

SI tomonidan yuzaga kelayotgan tahdidlar haqida gapirar ekan, ser Ken shunday dedi: "Biz qidiruv va hujum metodologiyasini takomillashtirish uchun SIdan foydalanishga uringan terrorchilarni tutdik, Bunda SI bilan jihozlangan dronlar yangicha tus bermoqda".

Temz-xausda soʻzlagan ser Kenni eng koʻp tashvishga solgan tahdid — ekstremistik guruhlar tomonidan biologik qurol yaratish uchun SIdan foydalanilishi boʻldi.

U bu tahdid "hali amalga oshmaganini" aytdi, ammo bu texnologiya "mavjud yoki hatto yangi biologik qurollar boʻyicha xavf darajasini oʻzgartirish salohiyatiga ega" ekanidan ogohlantirdi.

Ser Ken soʻzida davom etdi: "Bu xavflar haqiqiy. Buyuk Britaniya razvedka hamjamiyati — MIS, GCHQ, M16 — ularga qarshi kurashish uchun Buyuk Britaniyaning dunyo miqyosida tan olingan SI xavfsizligi instituti bilan yaqindan hamkorlik qilmoqda".

Aprel oyida Buyuk Britaniyada terroristik tahdid darajasi soʻnggi besh yil ichida birinchi marta oʻta yuqori darajaga koʻtarildi, bu hujum sodir boʻlish ehtimoli juda yuqori ekanini anglatadi.

Ser Kenning aytishicha, Al-Qoida va oʻzini "Islomiy davlat" deb atovchi guruh kabi islomiy tashkilotlar hujumlarni boshqarishda va ruhlantirishda davom etmoqda, shu bilan birga, yuqori xavf "sezilarli darajada" oʻng ekstremistik terrorizm bilan ham bogʻliq.

U soʻzida davom etdi: "Oʻtgan yil davomida eng sezilarli tendentsiya shu boʻldiki, muhojirlarga va musulmonlarga qarshi norozilikning ekstremistik koʻrinishlari terroristik niyatga aylanib ketish holatlari koʻpaydi".

Ser Kenning aytishicha, oʻng ekstremistik terrorizm internet taʼsirida "yosharishga" moyil boʻlmoqda — u MI5 soʻnggi oylarda "Buyuk Britaniyada radikallashgan 13 yoshli oʻng ekstremist"ga nisbatan tekshiruv oʻtkazganini qoʻshimcha qildi.

U shunday dedi: "Ushbu surishtiruv xalqaro hamkorlarimizdan biriga oʻz hududida halokatli hujumning oldini olish imkonini bergan maʼlumotlarni taqdim etdi".