Meros roʻyxatiga kiritildi
Pomir petrogliflari YUNESKOning Umumihon merosi dastlabki roʻyxatiga kiritildi
**Meros roʻyxatiga kiritildi**
Tojikiston sharqidagi Togʻli Badaxshon muxtor viloyatida joylashgan beshta petrogliflar majmuasi, shuningdek, mamlakat janubidagi Xatlon viloyatida joylashgan toʻrtta tarixiy-tabiiy yodgorlik YUNESKOning Butunjahon merosi dastlabki roʻyxatiga kiritildi. Bu haqda Tojikiston hukumati huzuridagi Tarixiy va madaniy merosni muhofaza qilish agentligi maʼlum qildi.
Idora saytidagi xabarda aytilishicha, agentlik tashabbusi va taklifiga binoan roʻyxatga Langar, Darshayr, Shaxta, Nayzatosh va Baxmaljilga petrogliflar majmuasi kiritilgan. Bundan tashqari, unga Xatlon viloyatining Xovaling nohiyasida joylashgan Kuldara, Lohuti, Obi Mazor va Xonaqo qadimiy tarixiy-tabiiy yodgorliklari ham kiritilgan.
«Ushbu petrogliflar va qadimiy yodgorliklar Tojikiston tarixiy va madaniy merosining qimmatli namunalari sifatida muhim ilmiy, madaniy va tarixiy ahamiyatga ega», — deyiladi agentlik xabarida. U yerda ularni saqlab qolish qadimgi tsivilizatsiyalar tarixi va mintaqaning madaniy rivojlanishini oʻrganish uchun alohida ahamiyatga ega ekani taʼkidlangan.
Idora ushbu yodgorliklarning dastlabki roʻyxatga kiritilishini «Tojikistonning tarixiy, madaniy va tabiiy merosini xalqaro miqyosda taqdim etish, shuningdek, uni saqlash, oʻrganish va ommalashtirish borasidagi ishlarni kengaytirish yoʻlidagi muhim qadam» deb atadi.
YUNESKO maʼlumotlariga koʻra, dastlabki roʻyxatga kiritilgan petrogliflar majmuasi turli tarixiy davrlarga — mezolit, neolit, bronza va temir asrlariga, shuningdek, Oʻrta asrlarga tegishli. Petrogliflarda togʻ hayvonlari, antropomorf figuralar, ov sahnalari, turli ramzlar va geometrik shakllar tasvirlangan.
Kuldara, Lohuti, Obi Mazor va Xonaqo arxeologik majmualari paleolit davriga oid deb hisoblanadi. Ushbu tarixiy yodgorliklar hududida ibtidoiy odamlar hayotiga oid koʻplab dalillar saqlanib qolgan.