Men 27 yoshdaman va allaqachon vasiyatnomamni yozib boʻldim – buning sababi mana nimada

Men 27 yoshdaman va allaqachon vasiyatnomamni yozib qoʻydim — buning sababi quyidagicha

Vasiyatnoma yozish, ehtimol, 27 yoshlilarning aksariyati bajarishi kerak boʻlgan ishlar roʻyxatida yuqori oʻrinlarda turmas.

Biroq Erin Atkinson vafot etganidan keyin uning pullari va mol-mulki bilan nima sodir boʻlishi kerakligini allaqachon hal qilib qoʻygan.

«Boshida bu juda gʻayritabiiy tuyuldi, chunki vasiyatnomani keksa yoshli odamlar bilan bogʻlaysiz», deydi u.

Erin London universitetida psixologik tadqiqotlar sohasida ishlaydi va toʻrt yil oldin poytaxtga Bristoldan koʻchib kelgan. Hozirda u uyni ijaraga oladi va aniq maoshini oshkor qilishni istamasa-da, oʻzini alohida boy deb hisoblamaydi. Shunga qaramay, u baʼzi mulklari kimga tegishi kerakligini allaqachon tanlab boʻlgan.

Uning 7 000 funt sterlinglik mashinasi singlisiga qoladi. Sherigi sovgʻa qilgan tilla zanjir esa yana oʻziga qaytariladi. Shuningdek, u pullarining bir qismini oʻzi uchun juda muhim boʻlgan maqsadga xayriya qilishni soʻragan.

«Qalbimga yaqin boʻlgan narsalardan biri — bu endometrioz xayriya jamgʻarmasidir», deydi u.

«Maʼlum bir miqdordagi mablagʻni xayriya qilishni xohlashimni yozib qoʻya olishim menga haqiqiy kuch bagʻishladi».

Biroq, koʻplab yoshlar uchun vasiyatnoma tuzish juda muhim boʻlib tuyulmasligi mumkin, ayniqsa ular qoldiradigan hech vaqosi yoʻq deb oʻylashsa.

2025 yilgi Milliy vasiyatnomalar hisoboti (National Wills Report) shuni koʻrsatdiki, 18 dan 24 yoshgacha boʻlgan yoshlarning faqat beshdan bir qismida vasiyatnoma mavjud. Bu koʻrsatkich 22 dan 34 yoshgacha boʻlganlar orasida 33% gacha koʻtariladi, 55 yoshdan oshganlar orasida esa 56% ni tashkil qiladi.

Odamlarga onlayn tarzda vasiyatnoma yaratish imkonini beruvchi Morby ilovasi asoschisi Sofiya Maslinning aytishicha, vasiyatnoma tuzishdan oldin koʻp narsaga egalik qilish kerak degan ishonch u duch keladigan eng katta yanglishishlardan biridir.

«Odamlar yetarlicha mulkka ega emasmiz deb hisoblashadi. Lekin aslida, agar sizda qandaydir jamgʻarmalar, investitsiyalar, pensiyalar, ijtimoiy tarmoqlardagi akkauntlar boʻlsa, uy hayvonlaringiz boʻlsa, hatto dafn marosimi boʻyicha istaklaringiz boʻlsa ham — bularning barchasi haqida oʻylab koʻrish kerak», deydi u.

Erin uchun vasiyatnoma tuzish gʻoyasi birinchi marta dugonasi uy sotib olganida paydo boʻlgan.

Кейин у TikTok'da Maslinning vasiyatnomalar haqidagi muhokamalarini koʻra boshlagan. Maslin vasiyatnoma qoldirmasdan yosh vafot etgan amakivachchasining tarixi va bu uning oilasi uchun qanchalik qiyin boʻlgani haqida oʻrtoqlashgan edi.

Bu voqeani koʻrish Erinni oʻzi ham vasiyatnoma tuzish haqida jiddiyroq oʻylashga majbur qildi, shu bilan birga, oʻz buvisining vasiyatnomasi oilaga koʻrsatgan taʼsiri ham bunda rol oʻynadi.

«Buvim vafot etdilar va ularning vasiyatnomasi bor edi. Oilamiz ancha katta boʻlgani uchun bu juda murakkab jarayon edi. Vasiyatnomaning juda aniq koʻrsatmalar bilan yozilganini koʻrish menga oilaning zimmasidan katta bosimni olib tashlash mumkinligini koʻrsatdi», deydi u.

Bu jarayon, shuningdek, Eringa oʻzi oʻylaganidan koʻra koʻproq moliyaviy aktivlarga, jumladan, premium obligatsiyalarga ega ekanligini anglab yetishga yordam berdi.

Crombie Wilkinson advokatlik firmasidan Eleonor Xodgsonning aytishicha, hatto koʻp aktivlaringiz boʻlmasa ham, vasiyatnoma tuzishning amaliy sabablari boʻlishi mumkin.

«Bu nafaqat sizning aktivlaringizga yordam beradi, chunki baribir kimdir sizning bank hisoblaringiz va qarzlaringiz bilan shugʻullanishi kerak va bu [vasiyatnoma] turli toʻsiqlardan oʻtmasdan turib, bu ish bilan qonuniy shugʻullana oladigan shaxsni tayinlash imkonini beradi», deydi u.

Xodgsonning qoʻshimcha qilishicha, vasiyatnoma yoʻqligining qiyinchiliklarini vaqti kelmaguncha tushunish qiyin boʻlishi mumkin.

Maslinning aytishicha, yoshlar vasiyatnoma tuzishni keyinroq, hayotning keyingi bosqichlarida kerak boʻladigan narsa deb hisoblab, uni kechiktirishga moyil boʻlishadi.

«Haqiqat shundaki, kutilmagan hodisalar hayotning har bir bosqichida sodir boʻladi», deydi u.

Erin uchun uning vasiyatnomasidagi baʼzi narsalar moliyaviy jihatdan koʻra, hissiy jihatdan qimmatliroqdir.

Uning vasiyatnomasiga, shuningdek, oilasi bilishini istagan baʼzi mayda tafsilotlar ham kiritilgan — dafn marosimida oʻqilishini istagan sheʼridan tortib, tortiq qilinishini xohlagan ichimlikkacha.

Bu tafsilotlar haqida oʻylash unga vahimali tuyulmadi.

«Men uchun vasiyatnoma yozish yomon narsani kutish emas edi. Bu masʼuliyatni oʻz zimmamga olish va men uchun qadrli boʻlgan odamlarning hayotini osonlashtirish haqida edi», deydi u.

Vasiyatnoma yozish qoʻrqinchli va qimmat boʻlib tuyulishi mumkin. Ammo uni bepul yoki arzonroq narxda rasmiylashtirish yoʻllari mavjud.

Masalan, har noyabr oyida,

Advokat topganingizdan soʻng, oʻylab koʻrishingiz kerak boʻlgan bir nechta narsalar bor:

Merosxoʻrlaringizni tanlang:

Pullaringiz va mol-mulkingizni kimga qoldirishni xohlayotganingizni hal qiling — bu oilangiz, doʻstlaringiz yoki xayriya tashkiloti boʻlishi mumkin. Agar 18 yoshga toʻlmagan farzandlaringiz boʻlsa, ular uchun vasiylarni ham tayinlashingiz mumkin.

Vasiyatnoma ijrochisini tanlang:

Bu sizning istaklaringiz bajarilishini taʼminlaydigan shaxsdir. Bu ishonchli oila aʼzosi yoki advokat boʻlishi mumkin, lekin ular haq olishi yoki olmasligini tekshirib koʻring.

Uy hayvonlari haqida oʻylang:

Vafotingizdan keyin ularga kim gʻamxoʻrlik qilishini xohlashingizni koʻrsatishingiz mumkin.

Dafn marosimi boʻyicha istaklarni qoldiring:

Siz oʻz xohish-istaklaringizni, masalan, dafn etilishni yoki kuydirilishni (krematsiya) xohlaysizmi, shuningdek, musiqa, sheʼrxonlik yoki gullar kabi tafsilotlarni kiritishingiz mumkin.

Vasiyatnomangizni xavfsiz joyda saqlang va siz ishongan kishi uning qayerdaligini bilishiga ishonch hosil qiling. Agar vasiyatnomangiz topilmasa, bu kechikishlarga olib kelishi va istaklaringiz bajarilmay qolishini anglatishi mumkin.