Medvedev Germaniyaga to‘g‘ridan to‘g‘ri zarba berish bilan tahdid qildi
Medvedev Germaniyaga to‘g‘ridan-to‘g‘ri hujum qilish bilan tahdid qildi
Rossiya Xavfsizlik kengashi raisi o‘rinbosari Dmitriy Medvedev Germaniyaga “to‘g‘ridan-to‘g‘ri zarba” berish ehtimoli haqida gapirdi. Bu bayonot Germaniya hukumati Rossiyani Leypsig aeroportida dron va portlovchi moddalar yordamida diversiya uyushtirishda ayblaganidan so‘ng yangradi.
Rossiya prezidenti Vladimir Putin Germaniya tomonining ayblovlarini dalillarga asoslanmagan deb atab, ularni rad etdi. Rossiyaning Germaniyadagi elchisi ham shunga o‘xshash pozitsiyani bildirdi. Medvedev esa o‘zining Telegram kanalida Germaniya rahbariyatining Rossiyaga nisbatan siyosatini tanqid qilib, mamlakatdagi harbiy texnika ishlab chiqaruvchi korxonalarga zarba berish mumkinligini aytdi. Shuningdek, u Berlindagi “ayrim boshqa joylar” ham nishonga olinishi ehtimolini tilga oldi.
Rossiya Tashqi ishlar vazirligi esa Germaniya tomonidan ko‘rilayotgan choralarga “ko‘zgu” tamoyili asosida javob berilishini ma’lum qildi. Vazirlik vakili Mariya Zaxarovaning so‘zlariga ko‘ra, Moskva avvalgi “bir tomonlama va adolatsiz sanksiyalar”ga javob bergan usuldan foydalanishi mumkin. Rossiyaning aniq qanday choralar ko‘rishi hozircha ochiqlanmagan.
“Ko‘zgu” javobi Germaniya Rossiyaning Bonndagi bosh konsulxonasi va Berlindagi “Russkiy dom” faoliyatini to‘xtatgan taqdirda, Moskva ham Rossiyadagi Germaniya muassasalariga nisbatan xuddi shunday choralar ko‘rishini anglatishi mumkin.
Polsha bosh vaziri Donald Tusk may oyida NATO mamlakatlarini Rossiya Xavfsizlik kengashi raisi o‘rinbosari Dmitriy Medvedevning Yevropa haqidagi bayonotlariga jiddiy yondashishga chaqirgandi. Tusk yozgan postida NATO davlatlari bu Medvedevning ogohlantirishlarini e’tiborsiz qoldirmasligi kerakligini bildirgan.
Medvedev esa avvalroq X ijtimoiy tarmog‘ida Yevropa davlatlari Rossiyaga qarshi urushga “bir tomonlama kirganini” va bu holatni yevropaliklar tushunishi kerakligini yozgandi. U, shuningdek, “xotirjam uyqu tugadi” deb ta’kidlab, Yevropa aholisi “endi xavfli vaziyatga tayyor bo‘lishi kerakligini” bildirgan.