Marko Rubioning Oʻzbekistonga tashrifining yangi tafsilotlari maʼlum boʻldi

Marko Rubioning Oʻzbekistonga tashrifiga oid qoʻshimcha tafsilotlar maʼlum boʻldi

AQSh davlat kotibi Marko Rubio Markaziy Osiyo va Hindistonga safari doirasida 17–22 oktyabr kunlari Samarqandga tashrif buyuradi. Oʻzbekistonda u C5+1 formatidagi uchrashuvda ishtirok etadi va 200 dan ortiq kompaniya rahbarlari kiradigan AQSh delegatsiyasiga boshchilik qiladi.

AQSh Davlat departamenti matbuot kotibi ofisi xabar berishicha, tashrif Vashingtonning Markaziy Osiyo mamlakatlari bilan strategik hamkorligini mustahkamlashga, shuningdek, savdo va investitsiya aloqalarini kengaytirishga qaratilgan.

Samarqandda Rubio AQSh va mintaqaning besh mamlakati — Oʻzbekiston, Qozogʻiston, Qirgʻiziston, Tojikiston va Turkmanistonni birlashtiruvchi C5+1 vazirlar uchrashuvida ishtirok etadi. Bundan tashqari, har bir mamlakatning yuqori mansabdor vakillari bilan ikki tomonlama muzokaralar oʻtkazilishi rejalashtirilgan.

Alohida urgʻu iqtisodiyotga qaratiladi: davlat kotibi AQSh kompaniyalarining 200 dan ortiq rahbarlaridan iborat delegatsiyaga boshchilik qiladi. Davlat departamenti maʼlumotlariga koʻra, bu AQShning mintaqadagi eng yirik biznes-missiyasi boʻlib, savdo va investitsiya aloqalarini rivojlantirishda yangi bosqich boʻlishi kerak.

Samarqanddan soʻng Rubio Hindistonga joʻnab ketadi va u yerda Mumbai hamda Jamnagarda uchrashuvlar oʻtkazadi. Muhokamalar markazida strategik sheriklik, energetika va yangi investitsiya loyihalari boʻladi.

Avvalroq AQShning Janubiy va Markaziy Osiyo boʻyicha maxsus vakili Serjio Gor Rubioning yuzta kompaniyadan iborat delegatsiya bilan tashrifi haqida xabar bergan edi, ammo endilikda biznes-yetakchilar soni ikki baravarga oshdi.