Samarqandga Marko Rubio boshchiligida AQShning 100dan ortiq kompaniyalari vakillari delegatsiyasi tashrif buyuradi
Marko Rubio tashrifi davomida Oʻzbekiston, Qozogʻiston, Qirgʻiziston, Tojikiston va Turkmaniston tashqi ishlar vazirlari ishtirokidagi C5+1 vazirlar uchrashuvida qatnashadi
Samarqandga Marko Rubio boshchiligidagi AQShning 100 dan ortiq kompaniyalari vakillaridan iborat delegatsiya keladi
Oktabr oyi oʻrtalarida Samarqand shahriga AQSH davlat kotibi Marko Rubio boshchiligida 100 dan ortiq Amerika kompaniyalari vakillaridan tashkil topgan biznes delegatsiya tashrif buyuradi.
Qayd etilishicha, ushbu tashrifning maqsadi AQSH va Markaziy Osiyo oʻrtasidagi strategik sheriklikni rivojlantirish hamda ikki tomonlama diplomatik va tijorat hamkorligini mustahkamlashdan iborat.
Marko Rubio safar davomida Oʻzbekiston, Qozogʻiston, Qirgʻiziston, Tojikiston va Turkmaniston tashqi ishlar vazirlari ishtirok etadigan C5+1 vazirlar uchrashuvida qatnashadi.
Muzokaralarda mintaqaviy iqtisodiy aloqalarni chuqurlashtirish, energetika xavfsizligini kuchaytirish hamda C5+1 doirasida mintaqaning umumiy ustuvor vazifalariga birgalikda yechimlar ishlab chiqishga alohida eʼtibor qaratiladi.
AQSH davlat kotibi, shuningdek, Oʻzbekiston rahbariyati va mintaqa davlatlari vakillari bilan savdo aloqalarini kengaytirish, xususiy sektor investitsiyalarini ragʻbatlantirish hamda Markaziy Osiyoda iqtisodiy modernizatsiyani qoʻllab-quvvatlash masalalarini muhokama qiladi.