Maktab oshxonalarida qaysi mahsulotlar taqiqlangan?
Yangi oʻquv yili boshlanishi bilan mamlakat maktablarida nafaqat oʻquv sinflari, balki maktab oshxonalari ham jonlandi. Biroq umumiy oʻrta taʼlim muassasalarida har qanday turdagi mahsulot va taomlarni tayyorlash hamda sotishga ruxsat berilmaydi, buning uchun sanitariya qoidalari, meʼyorlari va gigiyena normativlariga asoslangan maxsus roʻyxat shakllantirilgan. Ushbu taqiqlangan roʻyxatga aynan qaysi mahsulotlar kiritilgani haqida […]
Maktab oshxonalarida qaysi mahsulotlar taqiqlangan?
Yangi oʻquv yili boshlanishi bilan mamlakat maktablarida nafaqat oʻquv sinflari, balki maktab oshxonalari ham jonlandi. Shu bilan birga, umumtaʼlim muassasalarida barcha mahsulot va taomlarni tayyorlash hamda sotishga ruxsat berilmaydi: buning uchun sanitariya qoidalari, meʼyorlari va gigiyena normativlari asosida tuzilgan maxsus roʻyxat tasdiqlangan.
Ushbu taqiqlangan roʻyxatga aynan qaysi mahsulotlar kiritilgani haqida Toshkent shahar Sanitariya-epidemiologik osoyishtalik va jamoat salomatligi boshqarmasi boʻlim boshligʻi Dilfuza Hikmatova batafsil soʻzlab berdi.
Toshkent va Oʻzbekiston maktab oshxonalarida zararli fastfud, uy taomlari, konservalar va pasterizatsiya qilinmagan sut mahsulotlari sotilishini taqiqlovchi qatʼiy sanitariya talablari amal qiladi.
Sanepidqoʻmita Toshkent shahar boshqarmasi boʻlim boshligʻi Dilfuza Hikmatova umumtaʼlim maktablarida sogʻlom ovqatlanishni tashkil etishni tartibga soluvchi qoidalar va sanitariya meʼyorlarini (SanPiN № 0017-21) eslatib oʻtdi.
Maktab oshxonalarida sotilishi butunlay taqiqlangan mahsulotlar roʻyxatiga quyidagilar kiradi:
Fastfud va sneklar: gamburgerlar, chizburgerlar, xot-doglar, chipslar, suxariklar, kiriyeshkalar, xrustyashkalar va qurt.
Ichimliklar: energetik, gazlangan va shirin rangli ichimliklar.
Konservalar va kolbasalar: har qanday konservalangan mahsulotlar, konserva qoʻshilgan taomlar, shuningdek, kolbasa mahsulotlari.
Souslar va zararli qoʻshimchalar: mayonez, ketchup, shuningdek, tarkibida sunʼiy boʻyoqlar, xushboʻylashtiruvchilar, konservantlar va taʼm kuchaytirgichlar boʻlgan har qanday mahsulotlar.
Shubhali va uyda tayyorlangan mahsulotlar: uy sharoitida tayyorlangan taomlar, uy tvorogi va sut mahsulotlari, pasterizatsiya qilinmagan sut, yaroqlilik muddati tugayotgan, qadogʻi shikastlangan yoki sifat sertifikatiga ega boʻlmagan mahsulotlar.
Xavfli mahsulotlar: butunligi buzilgan yoki salmonellyoz bilan zararlanish xavfi boʻlgan tuxumlar, shuningdek, kemiruvchilar va zararkunandalar tomonidan shikastlangan mahsulotlar.
Uy taomlari va tadbirlarga cheklovlar
Sanepidqoʻmita ota-onalarni tugʻilgan kunlar yoki maktab bayramlari munosabati bilan maktabga uyda tayyorlangan shirinliklar — tortlar, pishiriqlar va boshqa taomlarni olib kelish amaliyotidan voz kechishga chaqiradi. Oʻquv muassasalariga uyda tayyorlangan pishiriqlar va qandolat mahsulotlarini olib kelish va sotish xavfsizlik meʼyorlari bilan qatʼiyan taqiqlangan.
Idorada taʼkidlanishicha, bunday taqiqlar bolalar salomatligiga boʻlgan gʻamxoʻrlik bilan bogʻliq. Fastfud, chipslar va gazlangan suvlar tarkibida oqsil boʻlmagani holda juda koʻp miqdorda yogʻ va uglevodlar mavjud boʻlib, ular oqsilning oʻzlashtirilishiga toʻsqinlik qiladi, shuningdek, maktab oʻquvchilarida semirish va boshqa kasalliklar rivojlanishi xavfini oshiradi.