Toshkentda maktabgacha ta’lim markazi tashkil etiladi

Toshkentda Maktabgacha ta’limni rivojlantirish mintaqaviy markazi ochiladi.

Hukumatning 18-avgustdagi 446-sonli qaroriga ko‘ra, Toshkent shahrida Maktabgacha ta’limni rivojlantirish mintaqaviy markazi tashkil etilishi ma’lum qilindi.

Ushbu markaz Toshkent shahridagi maktabgacha ta’lim tashkilotlari direktor va mutaxassislarini qayta tayyorlash hamda ularning malakasini oshirish instituti qoshida faoliyat yuritadi.

Yangi tuzilmaning asosiy vazifalaridan biri maktabgacha ta’lim sohasida mintaqaviy va xalqaro hamkorlikni kengaytirishdan iborat. Shuningdek, YuNESKOga a’zo mamlakatlarning maktabgacha ta’lim dasturlari va usullari bo‘yicha qo‘shma tadqiqotlar o‘tkazish ham markazning muhim vazifalari qatoriga kiritilgan.

Markaz bolalarni erta rivojlantirishga yo‘naltirilgan ta’lim dasturlarini yaratish va amaliyotga joriy etishda ishtirok etadi.

Bundan tashqari, 2030-yilgacha maktabgacha ta’lim sohasidagi Toshkent deklaratsiyasining bajarilishi monitoring qilinadi. Markaz bu borada muntazam hisobotlar ham tayyorlaydi.

Pedagog kadrlarni qayta tayyorlash sohasida yangi yondashuvlarni joriy etish bo‘yicha takliflar ishlab chiqish ham belgilangan vazifalardan biri hisoblanadi. Shu bilan birga, markaz xalqaro treninglar, seminarlar va konferensiyalar tashkil etishda ham faol ishtirok etadi.