“Mag‘lubiyatimiz sababi — urush”: respublikachilar saylov haqida nima deyapti?
Vitse-prezident Jey Di Vens respublikachilarning mag‘lubiyatiga Eron urushi sabab bo‘lganini aytdi. Partiyaning ayrim vakillari esa aybni bevosita Trampning o‘ziga yuklamoqda.
“Mag‘lubiyatimiz sababi — urush”: respublikachilar saylov haqida nima deyapti?
AQSHdagi oraliq saylovlarning yakuniy natijalari hali rasman e’lon qilinmagan. Shunga qaramay, amaldagi prezident Donald Tramp yetakchiligidagi Respublikachilar partiyasi Kongress ustidan nazoratni yo‘qotgani allaqachon ayon bo‘lib bormoqda.
The New York Times prognoziga ko‘ra, demokratlar Vakillar palatasida 258 ta, respublikachilar esa 177 ta o‘ringa ega bo‘ladi. Senatda ham demokratlar 55 ta, respublikachilar 45 ta o‘rinni qo‘lga kiritishi kutilmoqda.
Trampning o‘zi respublikachilar uning ismi saylov byulletenlarida bo‘lmagani uchun mag‘lub bo‘lganini aytdi. Partiya rahbarlari esa natijalarga ehtiyotkorlik bilan munosabat bildirmoqda. Yuqori lavozimli amaldorlar orasida vitse-prezident Jey Di Vens eng ochiq bayonot berdi. U respublikachilarning mag‘lubiyatini Oq uy boshlagan Eronga qarshi urush bilan bog‘ladi.
Biroq partiyaning quyi pog‘onadagi vakillari prezidentni ochiqchasiga “respublikachilar mag‘lubiyatining tashkilotchisi” deb atamoqda.
So‘nggi ikki yil ichida Senatdagi respublikachilar katta yutuqlarga erishdi: ko‘chalar xavfsizroq bo‘ldi, amerikaliklar qo‘lida ko‘proq mablag‘ qola boshladi, oilalar va biznes uchun yangi rivojlanish imkoniyatlari paydo bo‘ldi.
Demokratlarning doimiy qarshiligiga qaramay, biz AQSH tarixidagi eng katta soliq oshirilishining oldini oldik, chegaralar xavfsizligini misli ko‘rilmagan darajada ta’minladik, prezident kabineti a’zolarini so‘nggi yigirma yildagidan ham tezroq tasdiqladik. Shuningdek, mamlakat bo‘ylab sudyalik lavozimlariga qat’iy konservativ qarashlarga ega shaxslarni Reygan ma’muriyati davridan beri eng yuqori tezlikda tayinladik.
Men jamoamiz va Amerika xalqi uchun qilgan barcha ishlarimizdan faxrlanaman. Kelgusi oylarda oldimizda turgan muhim vazifalarga ham katta umid bilan qarayman.
2027-yil yaqinlashar ekan, Demokratik partiyaning o‘ta so‘l, sotsialistik qanoti barcha yutuqlarimizni yo‘qqa chiqarishga urinayotgan bir paytda Senatdagi respublikachilar qo‘l qovushtirib o‘tirmaydi.
Yaxshiyamki, prezident Tramp hanuz Oq uyda. Biz u bilan birgalikda demokratlar tomonidan kuzatilayotgan ekstremizmning eng xavfli ko‘rinishlariga qarshi kurashamiz. Ularning radikal qarashlari jamiyatda odatiy me’yorga aylanishiga yo‘l qo‘ymasligimiz kerak.
Saylov kampaniyasi davomida Vakillar palatasidagi ko‘pchilikni saqlab qolish uchun tarixiy qonuniyatlarga qarshi borishimiz kerakligini tushungan edik. Garchi ushbu oraliq saylovlar natijalari biz kutgan va erishish uchun kurashgan natijalar bo‘lmasa-da, bu yangi kurashning boshlanishi, xolos.
Vakillar palatasidagi demokratlar ko‘pchiligi Amerika tarixidagi eng radikal va o‘ta so‘l kuchlar nazoratiga o‘tadi. Biroq respublikachilar Konstitutsiya va Amerikani dunyoning eng buyuk davlatiga aylantirgan qadriyatlarni himoya qilish uchun kurashni hech qachon to‘xtatmaydi.
Biz sog‘lom fikrga asoslangan dasturimizni ilgari surishda va Amerikani yana buyuk davlatga aylantirish haqidagi maqsadimizni amalga oshirishda davom etamiz.
2028-yilda esa Vakillar palatasidagi ko‘pchilikni qaytarib olamiz va boshlagan ishimizni oxiriga yetkazamiz.
So‘rovlarga ko‘ra, 2024-yilda Trampni qo‘llab-quvvatlagan ko‘plab saylovchilar g‘azab bilan demokratlarga ovoz berishni rejalashtirgan. Bizdan yuz o‘girganlardan yana bizni qo‘llab-quvvatlashlari uchun nima qilishimiz kerakligi so‘raldi. Ularning javoblari asosan to‘rtta masalaga borib taqaldi:
Urushni tugatish.
Yashash xarajatlari va inflyatsiyaga e’tibor qaratish.
“Avvalo Amerika” (America First) siyosatini amalga oshirish.
Isroil bilan munosabatlarni qayta ko‘rib chiqish.
Mag‘lubiyatimizga urush sabab bo‘ldi. Prezidentning o‘zi ham buni kecha kechqurun tan oldi.
Men hamon mamlakatimiz kelajagiga umid bilan qarayman. Bizni oldindan ogohlantirganlar haq edi. Endi bu kuchni o‘z qarashlaringizga yaqin respublikachilarni saylashga yo‘naltiring.
Saylov natijalaridan g‘azablanishga hamma haqli. Keling, bu g‘azabdan mamlakatimizni qutqarish yo‘lida foydalanaylik.
Demokratlar bunga qanday javob bermoqda?
Bugun Amerika xalqi aniq signal berdi: odamlar jamiyatni ajratadigan emas, birlashtiradigan siyosatni, o‘zlari duch kelayotgan muammolarga aniq yechimlar taklif qiladigan rahbarlarni xohlaydi.
Amaldagi ma’muriyat yana ikki yil faoliyatini davom ettiradi. Biroq bizning hozirgi vazifamiz — yeng shimarib ishga kirishish, vakolatimiz yetadigan joylarda o‘zgarishlarga erishish, bundan keyingi zararlarning oldini olish va kelajak uchun poydevor yaratish.
Chak Shumer
(hozircha) AQSH Senatidagi demokratlar ozchiligi yetakchisi
Barcha qiyinchiliklarga qaramay, demokratlar Senatda g‘alaba qozondi. Amerika xalqiga aytadigan to‘rt og‘iz so‘zimiz bor: yordam yo‘lga chiqdi.