“Lester Siti” sotuvga qo‘yildi: 2016-yilgi Angliya chempioni qanchaga baholanmoqda?

"Lester Siti" klubi sotuvga qo'yildi: 2016-yilgi Angliya chempioni qancha turadi?

Angliyaning 2016-yilgi chempioni "Lester Siti" futbol klubining egalari jamoani sotishga qaror qildi. The Athletic nashrining ma'lumotlariga ko'ra, klub egalari ushbu savdodan 300 million dollar daromad olishni maqsad qilgan. Biroq, jamoaning Angliya futbol tizimining uchinchi divizioniga tushib ketganligi sababli, klubning bozor qiymati 200 million dollargacha pasayishi mumkin.

Bo'lajak xaridor nafaqat asosiy jamoaga, balki butun boshli yirik infratuzilmaga ham egalik qiladi. Xususan, sotilayotgan aktivlar qatoriga "King Pauer" stadioni, "Sigrav" mashg'ulotlar bazasi, ayollar jamoasining "Belvuar Drayv" qarorgohi, klubga tegishli yer uchastkalari, futbol akademiyasi, ayollar jamoasi hamda Belgiyaning "Aud-Xeverle Lyoven" futbol klubi kiradi.

"Lester Siti" Angliyaning eng qadimiy futbol klublaridan biri hisoblanadi. Jamoa 1884-yilda tashkil topgan bo'lib, dastlab "Lester Foss" nomi bilan tanilgan, 1919-yildan boshlab esa hozirgi nomini olgan. Ma'lumki, klub 2016-yilda Angliya chempioni unvonini qo'lga kiritgan. Shuningdek, "Lester Siti" Angliya Liga Kubogining uch karra g'olibi hisoblanadi. 2021-yil may oyida esa klub Londonning "Chelsi" jamoasini mag'lub etib, o'z tarixida ilk bor Angliya Kubogida g'alaba qozongan edi.